Kynnoh ka KSU-EJH ba ai sngewbha ka sorkar da ka surok kaba jot bad pumpum

Syllad | The Rising MeghalayaNovember 4, 2023

Ki nongialam ka Khasi Students’ Union (KSU) East Jaintia Hills District Unit ki la leit iakynduh ia u Deputy Commissioner ka EJH halor ka jingsniew palat pud bad ka jingpumpum jong ka surok bah NH-6  kaba la ktah ruh wat ia ka koit ka khiah jong ki khynnah skul bad ki paidbah kiba iaid ba ieng naduh Tuber Shohshrieh, Khliehriat haduh Malidor .

Ha kane ka jingiakynduh na ka liang u Deputy Commissioner ula ong ba ki don ki private company kiba shim kontrak ban siangrong (repair) biang ia NH6 kawei na Malidor haduh Sonapyrdi bad ka kawei na Sonapyrdi haduh Khliehriat, hynrei kaba lyngngoh pat ba haduh mynta ym pat iohi satia ba kita ki kontraktor kin sdang ban trei ia kane ka  surok NH6.

Na ka liang ka seng lyngba une u kyrwoh  ka pynrem jur bad pynpaw ka jingsngew bynniaw jur ia kane ka jingleh ibeiñ jong ki bor ba dei khmih, kata naduh ka Sorkar MDA ba la lamkhmat da u Myntri Rangbah ka jylla u Conrad K Sangma kumjuh ia ka tnat NHAI kaba dei khmih ia kine ki surok.

Kumjuh ka seng ka pynrem jur ruh ia ki ngut ki MLA kata u Bah Kyrmen Shylla uba dei ruh Myntri sorkar bad ia ka kong Santa Marry Shylla MLA Sutnga Saipung kaba don ha ka Sorkar halor ka jingbym lah jong ki ban pynbor ia ka sorkar ba kan phaikhmat lem ban peit ia ka bha ka  miat bad ka koit ka khiah jong ki paidbah ka Constituency jong ki bad ia ka District hi baroh kawei.

Nalor kata ka KSU ka la pynpaw ba ki dukan sha ki la hap ban khang khyrdep noh namar ka jingjur u pumpum ka la wan rung haduh u khiew ja khiew jyntah bad haduh ki kamra thiah jog ki khunlung khynnah bad kaba la wanrah shisha ka jingeh kaba khraw ia ki paidbah jong ka thain hi baroh kawei.

Shuh shuh ka KSU ka la ong ba dei hangne ba paw ka jingbymler jong ki nongmihkhmat namar ba jur ka jingbamsap. Ai ba u paidbah un jubab ia kane ka jingshah lehbein.

Ha kajuh ka por ka KSU ka la ong ruh ba kane ka jingleh jong ka sorkar bad ki bor ba dei khmih ka pyni ba ki kwah ba ka seng bad ki paidbah ka thain kin pynlong da ka jingiakhih khnang ba kan sngewthuh halor kine ki jingeh baroh.