Kynnoh ka VPP ba shukor ka sorkar MDA ia ki kynhun dawa ILP ka Jylla
U nongialam ka Voice of the People Party (VPP) u Bah Ardent Miller Basaiawmoit haka 23 tarik Naitung u la kynnoh ia ka sorkar Meghalaya Democratic Alliance ba la ialam da u Conrad K Sangma halor ka jingshukor ia ki kynhun kiba kyrshan ia ka jingdawa Inner Line Permit (ILP) da kaba pass ia ka resolution ban pyntreikam ia ka ILP khnang ban pyllait ia lade na kane ka mat (issue.)
Haba kren sha ki lad pathai khubor shabar jong ka prokram kaba la long ha Nongkrem, u Bah Ardent u la ong ba um sngew kyndit shuh halor ka jingkren ba dang shen jong u Myntri Rangbah ka jylla u Conrad K Sangma ba kam ju don kaba kum kata ka ‘work permit.’
![](https://www.syllad.com/wp-content/uploads/2024/09/JIT-Vacancy-823x1024.avif)
“Ngam sngewkyndit shuh ia kum kane ka jingkren jong u CM namar Nga kynmaw ia ki kyntien kiba u la kren ha ka sngi ba u la shimti kum u Myntri Rangbah ka Jylla ha kaba u la ong “To ngin ym iakren shaphang ka ILP,” u la ong.
U la kynnoh ruh da kaba ong, “Kine ki briew kim kwah satia ia kino kino ki sienjam ne ki kyndon ain ban pynbeit (ngim ong ban khanglad ia ka leit ka wan jong ki briew) hynrei ban tehlakam ia ka jingwan rung kyrthep jong ki briew kiba na bar sha kane ka jylla namar phi iohi ba la knieh noh ia ki lad kamai kajih jong ngi da ki briew kiba wan na shabar ka jylla.”
Kumta, ki briew kiba ong ngim kwah ban iakren halor ka ILP ki dei ki juh ki briew kiba pynbiej ia ki paidbah ka jylla.
Da kaba pynpaw ba ka sorkar MDA ka la ka la shu pynbiej bad shet kylla ia ki Sengbhalang kiba la bteng ban dawa pyntreikam ia ka ILP, u president ka VPP u la kynnoh ba ka sorkar MDA ka la mynjur ne pass ia ka resolution kaba kyntu ia ka sorkar Pdeng ba kan pyntreikam ia ka ILP ym da ka jingthmu ban pyntreikam ia ka ILP hynrei ban pyllait syndon ia lade na ka jingeh kaba iadei bad ka ILP.
“Lymda dei kumta balei ba ka sorkar MDA kam shym la dawa na ka sorkar Pdeng ba ka dei ban weng noh ia ka hukum u President ba la pynmih ha kajuh ka sngi kaba ki shong dorbar ban weng noh ia ki kyntien “Khasi – Jaintia” na ka preamble jong ka Bengal Eastern Frontier Regulation (BEFR),” buh jingkylli u Bah Ardent da kaba bynrap “Nga la kren halor kane ba ki Sengbhalang ki la shah shetkylla ha ka sorkar MDA.”
“Mynta ka sorkar MDA ka la pyllait ia lade na ka mat kaba iadei bad ka ILP bad pynphai sha ka sorkar Pdeng, kaba pyni ba kiba kum kine ki briew kiba don ia ka rukom pyrkhat ka bym khuid kin ym pyrkhat na ka bynta ka bha ka miat jong ki trai shnong riewlum namar la pynheh pynsan ia ki shabar ka jylla Meghalaya, kin ym sngewthuh ia ka jingdonkam jong ki ain kiba treikam ban iada ia ngi,” u la ong.
“Kumta Ngam sngewkyndit shuh ia kane ka jingkren jong u CM, hynrei nga sngew synei na ka bynta ki sengbhalang kiba la shah pynbiej ha ka sorkar MDA-I da kaba pass ia ka resolution na ka bynta ban pyntreikam ia ka ILP hynrei khlem da don ia ka jingthmu ban pyntreikam ia ka,” ong shuh shuh u nongialam ka VPP.
Leave a Reply