Kynnoh ki kynhun seng Karbi ba kynthup ka Meghalaya ia ki 33 tylli ki shnong sha ka JHADC

Syllad | The Rising MeghalayaFebruary 20, 2025

Da ki phew tylli ki kynhun seng na West Karbi Anglong District, Assam ki la pynpaw ka jingsngewkhia kaba jur halor ka jingpyrshang jong ka Meghalaya ban kynthup ia ki 33 tylli ki shnong hapoh ka Jaintia Hills Autonomous District Council, kata ha ka por ba ka jingiakren pynbeit pud ha ka wat kaba ar ka dang iaid shakhmat hapdeng kine ki artylli ki jylla ba marjan.

Ki la kam ba kine ki shnong ki dei kiba shah pynrung beain hapoh Barato-Mukroh constituency kaba hap hapoh Jaintia Hills Autonomous District Council (JHADC), shwa ka jingpynlong ia ka elekshon ADC ka ban long ha ka 21 tarik Rymphang.

Ha ka dorkhas ba la shah sha u Myntri Rangbah ka Assam u Himanta Biswa Sarma lyngba u Deputy Commissioner ka West Karbi Anglong District ha ka 19 tarik Rymphang, kine ki kynhun seng ki la pynpaw ia ka jingbitar halor kaei kaba ki la khot ka jingthombor kaba pyllein pyllein da ki bor sorkar ka Meghalaya. Ki la pynpaw ba baroh ki 33 tylli ki shnong kiba kynthup ia 15 tylli ki shnong ba shong ba sah ki Karbi bad 18 kiba shong ki Khasi Pnar ki dei kiba hap hapoh u pud u sam ba la pynbna da ka ain jong ka West Karbi Anglong, hynrei ia kaba la pynrung beain ha ka thup pynrung kyrteng ne ka electoral map jong ka Meghalaya.

Ka dorkhas ka la kynnoh ruh ba arngut ki kyrtong, kata ka Banikas Laban na ka Congress bad u Aibor Shadap na ka NPP ki la wan ialap elekshon bha bha ha kine ki shnong kiba hap hapoh ka Assam khlem da don kino kino kiba wan ban tuklar na ka liang ki bor ba dei khmih jong ka thain. Kine ki kynhun seng ki la kynthoh jur ruh ia ka jingbym leh ei ei jong ki bor District bad ki bor pulit da kaba kynnoh ruh ba ki la leh matlah halor kane ka jinglong jingman.

Da ka jingnang jur ka jingsngewkhia hapdeng ki nongshong shnong ha lynter ki jaka kiba don hapdeng ka jingiakajia pud, kine ki kynhun seng ki maham ruh ba kane ka jingleh ka lah ban lam sha ka jingiakynad bad pynthud ia ka shongsuk shongsain hapoh ka thain. Ki la kyntu ruh ia ka sorkar Assam ba kan shim mardor ia ki sienjam bad ban pynlong ka jingiakren bad ki bor sorkar ka Meghalaya khnang ban khanglad ban pynjur ia ka jingiakynad.

Ka dorkhas ka la ban jur ruh ba ki pud ki sam jong ka Karbi Agnlong ki dei kiba la pyntreikam naduh u snem 1951, ki la iai neh khlem jingkylla, bad ba ka Assam kam shym la kyntur pud satia shapoh Meghalaya. Ki la kyntait ruh ia kata ka jingong ‘ ka kam iakajia pud’ kum ka jingleh thok kaba la shu thaw da ki kynhun kiba khwan myntoi ban pynthud ia ka shongsuk shongsain.

Na ka liang ki kynhun seng ki la pynrem jur halor kane ka jingkynthup ia kine ki shnong ha ka thup ki nongthep vote jong ka Meghalaya da kaba shim ba ka dei ka jingleh pynbitar bad kaba ym lah ban pdiang. Ki la kyntu ruh ia ka sorkar Assam ba ka dei ban tuklar mardor bad ban rah ia kane ka kam bad ka sorkar Meghalaya khnang ban khanglad ban pynjur shuh shuh ia ki kam iakajia jaka.