Kynnoh ki MDC BJP ba pyndonkam bakla u ma Thombor sa T.2.50 klur ka pisa JHADC

Syllad | The Rising MeghalayaJuly 1, 2020

Ki lai ngut ki BJP MDC jong ka JHADC kiba kynthup ia u ma Lakhon Biam ma Krison Langstang bad u ma Dawan Lyngdoh ki la lap ia ka jingpyndonkam bakla ia ka pisa jong ka Council haduh Rs.2,50,00,000/- tyngka (ar klur san phew lak tyngka) da u CEM ka JHADC Jowai.

“Ngi kwah ban pynkynmaw kumba la paw ha ki kot khubor ha ka 29^th Rymphang 2020 u CEM T. Chiwat u la pyndonkam bakla haduh Rs. 4,00,00,000/- tyngka (saw klur tyngka). Lada u CEM um pyndonkam bakla kumne ia ka pisa ka council naka por sha ka por kam long kaba eh ia ka council ban siew ia ka tulop jong ka JHADC Jowai,” la ong ki MDC BJp u kyrwoh ba kila phah sha u syllad.com

Katkum u kyrwoh ki MDC BJP ki ong ba kane ka la buh ia ka Council ha ka jingeh kaba khraw namar kane ka jingpyndonkam bakla ia ka pisa ka Council ka iai bteng man ka por, kumta naka liang jong ngi ki MDC BJP ngi kwah baka jaidbynriew kan im lyngba ki riti ki dustur kiba ka Council ka don ngi pyrshah jur ia kane ka jingpyndonkam bakla ia ka pisa jong ka Council wat ha pdeng kane ka jingeh kaba khraw namar baroh ngi tip lada ka Council kam lah shuh ban siew tulop ia ki nongtrei jong ka kan duh kan dam noh ha kawei ka sngi, namar kane ka ktah ia ka jingtreikam ka ophis jong ka JHADC bad ia ka jiatbynriew jong ngi baroh kawei.

Kane ka jingpyndonkam bakla u CEM ia ka pisa ka Council naka por sha ka por ka la ktah jur ia ka jingtreikam ka Council, kumta ngi dawa na u CEM ka JHADC ban pynphai ia kane ka pisa khnang ban ioh siew tulop ia ki nongtrei bad kiwei kiwei ki jingdonkam ka Council.