Kynnoh leh khlem akor u Pulit Sub Inspector ïaka Muktiar

Syllad | The Rising MeghalayaNovember 11, 2019

KHLIEHRIAT: Kawei ka Muktiar kala mudui da ka jingujor ejahar pyrshah ïa uwei u Pulit Sub-Inspector uba la tip kyrteng kum u Habanjop Khonglah bad kynnoh ba ula phah iaki message (sms) khlemakor lyngba ka whatsapp number jong u sha ka.

La kynnoh ba une u Pulit Habanjop Khonglah, uba dei ruh u Incharge ka Ladrymbai Out Post, East Jaiñtia Hills District ula leh kynshlein ruh iaka da kaba bat iaka kti jong ka haka por baka leit donkam ha katei ka thanad ha kaba iadei bad ki kam mukotduma.

Katkum ka ejahar kaba la ujor kane ka Muktiar kala iathuh kadei ka kaba dang sdang pyrshang ban iasaid aiñ bad kala leit ha katei ka thanad arisien bad une u ophisar ula bat iaka kti jong ka bad haba kala kren khor ula pan map iaka jingbakla jong u.

Kane ka muktiar la kynnoh ba wat hadien ba ula pan map ula bteng ban phah iaki message (sms) khlemakor kaba ktah iaka burom ka ijot jong ka kum ka kynthei briew.

Haka 8 tarik une bnai, une u Pulit ula tam pud shaba palat ha kaba ula phone da ka video call haka por ba ka niah kali bad kala kum pdiang iaka call bad kala kynnoh ba ula pyni da ka dur khlem akor bad ka jinglong shynrang jong u, kaba kane ka Muktiar kala klumar ki jingmut jingpyrkhat kala ong haka ejahar.

Kala pynpaw ba kane ka jingleh jong une u pulit kala pynwit pynthud shikatdei eh ia ka jingmut jingpyrkhat jong ka bad buh iaka jingim jong ka haka jingma bad ktah iaka burom ka ijot jong ka kum ka kynthei.

Kane ka muktiar kala pynpaw ba une u Pulit ula pyndonkam bakla iaka bor jong u, kum u pulit bad ha kano kano ka por u lah ban shim iaka aiñ ha kti jong u bad kala kyrpad naka bor jong ka aiñ ban pynshitom ia une u pulit katkum ki kyndon jong ka aiñ.

Ka khubor kaba iohlum ba kane ka Muktiar kala ujor iaka ejahar naduh ka nohphaisngi jong ka 9 tarik une u bnai, hynrei ki bor Pulit jong ka Khliehriat Police Station kim shym la leh eiei bad kem ia une u Pulit Sub Inspector.