Kynnoh lehbeijot u Dolloi Nartiang iaka longkmie

Syllad | The Rising MeghalayaDecember 5, 2020

U Dolloi jong ka Nartiang u Hepsing Dhar ula shah kynnoh ba ula lehbeijot ia kawei ka longkmie ha kawei ka shnong kaba hap ha Nartiang Police Station, West Jaintia Hills District.

Kane longkmie kaba shah lehbeijot kala kynnoh ba u Dolloi Nartiang, u Hepsing Dhar, uba dei u kobiraij ne u nongai dawai ula leh ia kane ka kam sang haka iing jong ka meiheh jong ka.

Kane ka jingjia kala jia haka 30 tarik u bnai Naiwieng 2020 haka por 3 baje nohphaisngi.

La kynnoh ba une u dolloi ula wan ha katei ka longiing ban ai ‘nasib’ katkum ka jingngeit jong ki ban beh iaka sniew ka smeh naka iing ka sem jong ki, phewse ula shah kynnoh ba u leh pynban da katei ka kam sang pyrshah iaki kynthei ki khynnah.

“Shuwa ban leh ia kane ka kam ula khot ia ki shynrang jong katei ka longïing baroh ha katei ka iing, hadien pat iaki kynthei ban ai kata ka ‘nasib’. Hynrei haba la poi ka pali jong nga ula shim por bha bad ula kren ki kyntien ki bym sngew tynnad bad ula phah law iaki jain ki sopti jong nga kiba nga la kyntait ban leh ia kaba u bthah,” la ong ka longkmie.

“Une Hepsing Dhar ula ong ba ‘nasib’ jong nga ka kham eh bad ula ai ia nga ia ki kynja murit (pepper) hadien ba nga la bam ngam tip briew shuh. Nga la mut ban pyrta jingiarap, u ryndang jong nga ula set, ki kti ki kjat jong nga ki la tlot bad une u Hepsing ula lehbeijot ia nga hapoh katei ka kamra,” ong shuh shuh kane ka longkmie.

“Nga sngewthuh lut ia kaba u ktah iaka met jong nga, hynrei ngam lait kren bad ngam lah ban pynkhih iaki kti ki kjat jong nga,” ong ka longkmie.

Halor kane ka kmie jong kane ka longkmie kila dep ujor ejahar ha khmat ki Pulit Nartiang haka 3 tarik une u bnai Nohprah 2020

U Superintendent of Police, West Jaintia Hills u Bikram D Marak ula iathuh ba kila ioh pdiang iaka ejahar bad ka jingtohkit kala iaid shakhmat.

Kumban shu pynkynmaw une u dolloi Nartiang ula shah set phatok teng halor ka jingshah kynnoh ban leh beijot iaka longkmie kaba wan shim dawai na u na Mukhla ha u snem 2018.

Nalor kane kawei pat ka mukotduma ka dei halor ka jrong kti jong u ia kawei pat ka khynnah kaba ki Pulit jong ka Jowai PS kila pyngngat ia u haka POCSO Act.