Kynnoh u Bah Ardent bym leh ei ei ka sorkar ia ki nongialam shnong ba pynbor thep vote ha Rilum Jaintia

Syllad | The Rising MeghalayaMarch 4, 2025

U nongialam ka Voice of the People Party (VPP) uba dei ruh u MLA ka Nongkrem u Bah Ardent M Basaiawmoit ha ka 3 tarik Lber u la ther tyngeh halor ka jingpulom jong ka sorkar ban leh ei ei pyrshah ia ki nongialam shnong ha Rilum Jaintia halor ki jingkynnoh pynbor ia ki nongthep vote ban kyrshan ia ki kyrtong kiba ki kyrshan ha kane ka elekshon sha ka Jaintia Hills Autonomous District Council (JHADC) kaba dang shu dep.

Haba iashim bynta ha ka jingiatai halor ka jingkren jong u Lat, u Bah Ardent u la ong ba u pyrshah jur ia ka jingkren ba la kdew kaba pynpaw ba ki bor pyniaid district bad ki bor pulit ki la shim ia ki sienjam kiba pura ban pynthikna ia ka jingiaid beit ha ka jingpynlong ia kane ka elekshon ADC.

“Nga pyrshah jur ia kane ka jingkren namar ka jingpynlong ia kane ka elekshon kaba iaid beit iaid ryntih ka la jia tang ha ki constituency kiba hapoh KHADC hynrei ym ha ka elekshon ha JHADC. Nga la kren shai ia kane bad ngan ieng skhem ha ka nongrim ba lada ka elekshon ha JHADC ka long kaba iaid beit iaid rynih, ka VPP ka lah ruh ban thaw wat ia ka Executive Committee ha JHADC,” u la ong.

U la bynrap da kaba ong, “Kum ka party la pyntip sha ngi halor ki rukom tynrai kiba ju long, ki jingleh bad ka kolshor ha Rilum Jainia ha kaba ka don ka kolshor ba ki nongialam shnong kin shim ia ka rai iano ban kyrshan, bad kine ki nongialam kin pynbor ia ki briew hapoh ki shnong ki jong ki ba ki dei ban jied tang ia u kyrtong uba ki nongialam shnong ym ki nongshong shnong ki kyrshan.”

Une u nongialam ka VPP u la kynnoh ba ki bor pyniaid district kim shym la leh ei ei wat halor ki jingshisha ba ka party jong u ka la register ba baroh kine ki dei ki polling station ki dei kiba don jingma shibun na ka jinglah ban mih ka huri hura.

Haba pynpaw ba ka JHADC ka la sakhi ia ki kam leh donbor ha kiba bun tylli ki polling station, une u nongialam ka VPP u la ong, ” Ki don bad nga katto katne ki polling station ha kaba phin pyrkhat kumno kane kan jia, ha Moolamanoh A polling station na baroh ki 609 vote haduh 593 vote ka la leit tang sha uwei u kyrtong ba la kyrshan da ki nongialam shnong, bad na ki 604 ha Moolamanoh B haduh 589 vote ki leit tang sha uwei u briew ba la kyrshan da ki nongialam shnong.Ha Wapungskur A na ka 782, haduh 656 ka la leit tang sha uwei u briew ba la bei bad kyrshan da ki nongialam shnong bad ha Khliehriat East na ka 780, mutdur kaba kum kano kane ka elekshon? Haduh 778 ka la leit tang sha uwei u briew ba la kyrshan da ki nongialam shnong bad na ka 872, haduh 862 biang ki leit sha u kyrtong ba la kyrshan da ki nongialam shnong.”

“Kumta shano kata ka elekshon kaba iaid beit iaid ryntih?” U la buh jingkylli da kaba bteng ban kynnoh ba ki paidbah ki la shah dawa ban wan aiti ia ki EPIC jong ki sha ki nongialam shnong.

“Uwei na ki polling agent u jong ngi ha Nartiang constituency u la shah rahbor bun bun kynta ha katei kasngi bad uwei pat hapoh Shilliang-Myntang constituency u la shah rah ha kine ki nongialeh pyrshah kiba la thmu ruh ban bret ia u nalor ka jingkieng. Kumno phi lah ban ong ba ka elekshon kaba iaid beit iaid ryntih?”

Nalor kata, une u nongialam ka VPP u la ong ba ka party jong u kan ym randien khnang ban pynthikna ba ki paidbah ka Rilum Jaintia kin ioh ia ka kabu ban pyndep ia ki hok thep vote jong jong ki da kaba laitluid.