Kynnoh u Bah Vincent Pala ba u Sniawbhalang Dhar u dei u nongaiktien ka RSS bad BJP

Syllad | The Rising MeghalayaAugust 23, 2024

U President ka Meghalaya Pradesh Congress Committee (MPCC) u Bah Vincent H Pala ha ka 22 tarik Nailar u la kynnoh ia u National General Secretary ka National People’s Party (NPP) uba dei ruh u Symbud Myntri Rangbah ka Jylla u Bah Sniawbhalang Dhar ba u dei u nongaiktien jong ka Seng Rashtriya Swayamsevak Sangh (RSS) bad ka Bharatiya Janata Party (BJP).

Ia kane u Bah Pala u la pynpaw haba kynthoh tyngeh ia ka jingkren jong u Bah Sniawbhalang uba la ong ba ka Congress shen kan sa jah kyrteng noh na Meghalaya hadien ka jingleit pyniasoh jong ki laingut ki MLA jong ka kiba kynthup ia u Bah Gabriel Wahlang (Nongstoin), Dr Celestine Lyngdoh (Umsning) bad Bah Charles Marngar (Mawhati) sha ka NPP.

Une u MP barim ka Shillong u la kam ruh ba u dang kham heh spah ma u ban ia ka NPP ban leit iasoh bad ka.

“U Sniawbhalang Dhar u dei u nongaiktien ka RSS. Ka RSS lane ka BJP kat sha ba ki don, ka sur jong ki ka dei ka Congress Mukt. Kumta u Sniawbhalang u hap ban pynsngew ia kane lem kumta ki tip lut ia baroh ki kam beain, kata naduh u drok, dewiong bad kiwei kiwei ia kiba la leh da u Bah Sniawbhalang Dhar bad ki paralok jong u,” ong u Pala haba kren sha ki lad pathai khubor.

Da kaba kynnoh ba u Bah Sniawbhalang u dei uba don hapoh ka jingpeit pyrman jong ka CBI, u Bah Pala u la ong, “Nga la dei u MP, Nga la tip. Ki ju wan sha nga bad pan jingtip. Baroh ki file ki la don halor ka miej jong ki. Ka por kan sa poi bad ngin sa iohi uei u Sniawbhalang. Ka histori kan sa iathuh uei u Pala bad uei u Sniawbhalang?”

Haba kdew halor ka jingshah kem jong u Arwind Kejriwal lem bad kiwei pat ki nongialam sain pyrthei kaba kynthup ia u Myntri Rangbah barim, une u nongialam Congress u la ong, “Ki kam kiba ki la leh shisien ka sngi kin sa ngat ia ki ha ka jingeh.”

“Mynta ki hap ban kren ia ka sur jong ka BJP lem kumta kin shah leh tyngeh ha ka BJP, kumta ka sur u Bah Sniawbhalang ka long shispah percent ka sur jong ka BJP, ka sur jong ka RSS. Ki nongshong shnong ka Meghalaya ki dei ban tip u dei uei,” kynnoh shuh shuh u Bah Pala.

Ha kaba iadei bad ka jingong jong u Sniawbhalang ba ka NPP ka pdiang sngewbha ia u Bah Pala lada un wan pyniasoh ha kano kano ka por, une u nongialam ka Congress u la jubab da kaba ong, “Nga tharai ba u Bah Pala u kham riewspah ban ia ka NPP.”