Kynnoh u CEM Karbi Anglong ba ki Khasi Pnar ki dei ki poiwir pynrem u khlieh ka JHADC & SHM

Syllad | The Rising MeghalayaNovember 30, 2022

U Chief Executive Member jong ka Jaintia Hills Autonomous District Council (JHADC) bad ka kynhun jong ka Save Hynniewtrep Mission (SHM) haka sngi Balang kila pynrem jur iaka jingkynnoh u Chief Executive Member ka Karbi Anglong Autonomous Council (KAAC) ba ki nongshong shnong ka Mukroh ki dei ki poiwir.

U CEM KAAC Tuliram Ronghang ula ong ia kane haka lad pathai khubor paidbah jong u hadien ka jingjurip iaka Mukroh bad ka Forest Check Gate ka Assam haka sngi ba Ar. “Wat tang shi inshi ka jaka puta jong ka Karbi Anglong kan nym leit sha kiwei pait ki nongshong shnong beaiñ”, la ong u Tuliram bad bynrap ban pynkhlain iaka bor pahara da kaba buh iaki Assam Battalion bad ki CRPF camp ha katei ka thain khappud Assam Meghalaya.

Shuh shuh ula ong ba yn pynieng da u mot jong u forest guard ka Assam Bidya Sing Lekthe uba la iap ryngkat bad ki san ngut ki nong Mukroh haka jingsiat pathar ki Pulit Assam kaba la jia haka 22 tarik Naiwieng 2022.

Tang hadien bala saphriang kane ka jingthoh u Tuliram, ka SHM kala ai da ka jingthoh sha u CEM JHADC ma Thombor Shiwat ban dawa ban na u CEM ka JHADC ban shim khia ban ïada ïaka khyndew ka shyiap bad u pud u sam jong ki shnong bad Elaka kiba hap hapoh ka JHADC bad ka la dawa ruh ban pynbeit noh ïa u pud u sam hapdeng jong ka Meghalaya bad Assam da kaba pynshong nongrim ïaka history, ki map bad ki kot ki sla jong ki shnong bad ki Elaka kiba hap hapoh ka JHADC.

Ka SHM kala thang ruh iaka copy jingkren u Tuliram ban pynrem ia kane ka jingkynthoh khlem nongrim u CEM ka KAAC ha khyrdop jong ka JHADC.

U Thombor Shiwat CEM ka JHADC u pynrem jur ïaka jingthoh bad ka jingkren u CEM ka KAAC da kaba ong, ka Council ka pynthikna baka Mukroh ka don ia u pud u sam ba biang bad ka long ruh ka shnong bala rim bha kynthup kiwei pat ki shnong ba don ha khappud dei kiba la shong shnong hashwa ka notification jong u snem 1952.

Ka JHADC ka don ïaka jingkitkhlieh bynta ki briew ba shong ba sah ha Khappud bad kum ka nongpeit ïaka khyndew ka shyiap kam ailad ban duh noh iaka hok jong ki nongshong shnong.

Ula ìathuh ba na ka liang konsil ruh ki la dep phah shaka sorkar Jylla ba baroh ki jaka ki khyndew ba hap hapoh u pud u sam ka District Council bad lada dawa ruh kine ki jaka ka konsil kam dei ban duh.

Kumjuh ruh ïaki shnong Pnar ba don ha Block -I ki dei ban wan phai biang lada ka jingia pynbeit pud haki ar Jylla kan iaid shakhmat, naba ki don iaki sakhi sabut lyngba ki kot ki sla.

Nangta u la ong ba ula phah ruh iaka khubor shaki briew ba don sha khappud ba kim dei ban artatien namar ka District Council ka don ban iada ïaka khyndew ka shyiap katkum ki kot pynshisha ba ka don.

U Robertjune Kharjahrin ula ong, kane ka jingthoh jong u, ka pynpaw ba ka KAAC ka shim ïaki nongshong shnong na ka jaitbynriew Khasi Pnar kiba shong ba sah ha Mukroh bad lehse ha kiwei ki jaka kum ka Psiar, Khanduli bad Block-I kum kita ki poiwir ba shong beaiñ (illegal settler).

Ula ong ka SHM ka pynrem jur ïa kane ka jingthoh laplah jong une u nongïalam ka KAAC bad ka pynpaw shai ba une u briew um don jingtip eiei ruh em halor ka history bad halor ka jingshisha ha kaba ïadei bad ka khyndew ka shyiap ha Mukroh, Barato, Psiar, Khanduli bad Block-I bad Block II.

Ula ong ym dei ban klet ba ka KAAC ka dang mih tang haki snem 1952 shaneng hynrei ki briew na ka jaitbynriew Khasi Pnar ki la shong shnong haki thaiñ Mukroh, Psiar, Khanduli bad Block-1 (Labang Nongphyllut) kila shong sah da ki spah bad ki hajar snem bad ki Khasi Pnar ha kine ki thaiñ kidei ki trai ri trai muluk bad ki trai jong ka khyndew ka shyiap.

“Ki Khasi Pnar kimdei ki poiwir bad ki nongshong beaiñ kumba la thoh da u CEM ka KAAC”, la ong u Robertjune bad maham ia u CEM KAAC ba u dei ban tyngkan shuwa ba un kren.