Kynnoh u Chairman ka JHADC ia u ma Shitlang ba sniew ka surok NH 6

Syllad | The Rising MeghalayaJanuary 15, 2023

U Chairman ka JHADC bad MDC Bataw Lakadong Dr Sankey Shangpung ula kynnoh ia u MLA ka Sutnga Saipung ba sniew ka surok bah National Highway 6 kaba pyniasoh iaka Jylla bad ka bynta ba sharum ka Assam, Mizoram, Tripura bad Manipur.

U ne u MDC ula kynthoh ruh ia MP ka Shillong u ma Vincent H Pala ba ha ki 15 snem ka jinglong MP jong u, um shym la wanrah kano kano ka kam pynroi iaka Rilum Jaintia khamtam ka East Jaintia Hills District.

U Chairman ka JHADC ula ong ia haka jingialang pynkut iaka phubol Inter Dong ka shnong Umkiang haka jingiadonlang ka Candidate NPP kaba long ka kongsan Kong Santa Merry Shylla bad kiwei kiwei ki MDC kaba long haka sngi Saitjain ha Umkiang.

Une u MDC ka Bataw Lakadong udei uba jop na ka UDP bad ula pyniasoh sha NPP dangshen iaka sorkar MDA.

Kaba lyngngoh une u MDC ula ong “lada dei ma nga u nongmihkhmat ka thain ngan nym shah ban khrong pisa ha ka Toll Plaza kaba don ha Lumshnong namar bala sniew palat ka surok kaba dap da ki thliew ki syar,”

“Ka surok kaba sniew, hynrei ka pisa ki khrong, kane lehse kadei ka jingkheiñ sting jong u MLA ka Sutnga Saipung Constituency ban ïasaid na bynta ki nongshong shnong kane ka thaiñ”, la ong u Dr Sankey Shangpung bad bynrap ba kum u briew u Ma Shitlang Pale udei u briew uba bha haka ktien ka thylliej bad uba sngewrit hynrei katkum ka jingïohi jong u kum u MDC.

Shuh shuh une u MDC Bataw Lakadong, ula ong u Ma Shitlang Pale u ai jingshakri tang ïaki riew shimet ym ïaki paidbah ka Constituency.

“Ngam artatien ba ha kane ka kynti ruh ka party NPP kan ïalam biang ïaka sorkar bad ngam artatien ba napdeng ki arngut ki kyrtong MLA jong ka NPP na ka East Jaintia Hills District, ka Kong Santa Mary Shylla kan ïoh bat ïaka shuki myntri sorkar”, la ong u Dr. Sankey.

U Chairman jong ka JHADC ula kyrpad ïaki paidbah ka thaiñ Narpuh ba kin ailad noh ïa ka Kong Santa Mary Shylla ka kyrtong jong ka NPP da kaba klet noh ïaka jinglong babha jong u Bah Pale bad ka jinglong MP u Ma Pala.