Kynnoh u heh ka VPP ba pynlut por ki consultant ha ka lehkai PUB-G; 2 ki Adviser Sorkar sha Dubai peit Kriket

Syllad | The Rising MeghalayaMarch 7, 2025

U nongialam ka Voice of the People Party (VPP) kaba don ha ka liang pyrshah, u Bah Ardent Miller Basaiawmoit haka 7 tarik Lber u la kynnoh ba ki consultant ba la thung da ka sorkar Jylla ki la shu pynlut kai ia ka por ha kaba ialehkai “PUB-G”.

Ki consultant ba la thung da ka sorkar Jylla ki la pynlut kham bun ka por ha kaba ialehkai PUBG. Kane kam dei satia ka rukom namar ki shaniah ha ki trai shnong hynrei ki ioh baroh ki jingmyntoi,” ong u Bah Ardent haba iashim bynta ha ka iingdorbar ha ka jingiakren kyllum (general discussion) halor ka mang tyngka.

Une u MLA ka VPP na Nongkrem u la buh jingkylli ruh ba lada la thung ia ki consultant ha ki Tnad bapher bapher kumta ruh kaei ka jingmyntoi ban don ia ki Engineer, MCS bad kiwei ki Ophisar haba kim lah ban pyndep ia la ka jong ka kamram.

“La pyntip ha nga ba ki don katto katne ki ophisar kiba la shah pynkylla khlem kam bad ba kine ki consultant kim shym la burom ruh ia ki ophisar namar ki sngew ba ki don ia ka jingiadei kaba beit beit bad ka Ophis u Myntri Rangbah ka Jylla, bad kane ka pyntlot bad ktah jur ia kito ki ophisar ki tnad sorkar,” ong u Bah Ardent.

Nalor kata u la kynthoh pyrshah ruh ia ki arngut ki Nongaibuit ne Adviser ka sorkar Meghalaya halor ka jingpynlut por ha kaba leit peitkai kriket sha Dubai wat hapdeng ka dorbar mang tyngka ka Assembly kaba dang iaid shakhmat.

“Katba ka sorkar jylla ka dang pynlong dorbar, arngut ki Adviser jong ka ki dang pynlut por ha kaba leit peitkai kriket sha Dubai. Kane ka buh shibun ki jingkylli bad ki paidbah ki don ia ka hok ban kylli ba la kine ki Adviser ki pyndonkam da ka pisa paidbah lane ia ki lad ki kabu jong ka sorkar,” u la ong.