Kynnoh u MDC ka BJP ba pynsaja ka Sorkar ia ki paidbah ba duk da ka bai bording kaba heh

Syllad | The Rising MeghalayaAugust 11, 2024

U nongialam ka BJP uba dei ruh u MDC ka Tura u Bernard N Marak u la kyntu ia ka Sorkar Jylla ba ka dei ban pynsangeh mardor ban pynsaja ia ki paidbah ba duk ha ki thain nongkyndong da kaba pynngat da ka bai bording kaba heh.

Lyngba u kyrwoh ba la pyllait ha ka 11 tarik u Marak u la ong ba ka jingpynngat da ka bai bording kaba heh ka la ktah jur ia ka jinglong jingman bad ka jingim jong ki nongshong shnong kiba duk ha ki thain nongkyndong.

“Ka skhim Saubhagya ka Sorkar Pdeng ba la tip kum ka lain BPL kaba thmu ban pynbiang bording ia ki longiing kiba duk ha ki thain nongkyndong ka la kylla long pynban ka jingkit ba khia ia ki nongkyndong namar ka bai bording kaba heh kaba ki hap ban siew. Ka bai bording ka la kylla long pynban ka lad lute pisa na ki longiing kiba duk ha ki thain nongkyndong,” u la ong.

U la ong ruh, “Ka Smart metre ka dei kawei pat ka jingeh namar ia kine ki metre la shu wan pyndait khlem da ioh jingbit na ki nongshong shnong. Kito kiba buh ia ki Smart metre ki buh ia ki metre kiba thymmai ki bym biang bad bakla bad ki shim noh ia u metre ba la pyndait nyngkong ba la buh lyngba katei ka skhim. Ka bai bording kaba heh palat pud kiba ki longiing baduk ki shah pynngat ha kaba ki hap ban siew khlem beit namar kam shym la don kano kano ka jingpyllait ne ka jingmap lyngba ka ophis ba dei khmih wat hapdeng ki jingujor na ka por sha ka por.”

Katkum ka jingpynpaw ka jong u, une u nongialam ka BJP u la ong ba ki trai shnong riewlum kim donkam ban siew khajna ha kane ka Jylla, hynrei la pynngat pat da kawei pat ka rukom siew khajna (indirect) da kaba ai daw ban aijingshakri ha ka liang ka bording, mobile bad kumta ter ter.

U la ong ruh ba ka Sorkar Pdeng ka la mang pisa na ka bynta ban pynbiang bording sha ki thain nongkyndong na ka bynta kiba duk, hynrei ki longiing baduk ki la kylla lanot lyngba ki Tnat sorkar.

“Ka rukom pynngat bai bording ia ki longiing baduk la iohi kumba ka dei ka jingpyndonkam bakla bad shim kabu ban lute na ki trai shnong riewlum kiba shisur shidur ha ka rukom kaba da pynkhreh. Ha ki katto katne ki shnong ki longiing ki ioh ia ka bai bording watla kim shym la ioh bording bad don ruh katto katne ki shnong ki bym ioh bording jan da ki bnai, hynrei ka bai bording ka long kaba heh. Ki don katto katne ki longiing riewkynthei kiba la ujor namar ka jingioh pdiang ia ka bai bording kaba kot T.3,500 haduh 5,000 shi bnai,” u la bynrap da kaba dawa na ka sorkar Jylla ba ka dei ban sangeh mardor ia kane ka jingpynshitom ia ki paidbah baduk lyngba ka bai bording kaba heh.