Kynnoh u nongpynïaid ka SCML ba kiba pyrshah ïaka jingpynheh par mawshun ki dei ki riew shimkabu

Syllad | The Rising MeghalayaOctober 19, 2019

JOWAI: U Devender Bansal Management Representative, Star Cement Manufacturing Limited (SCML) ula kynnoh ba kiba pyrshah ïaka public hearing na ka bynta ban pynheh par mawshun kidei ki riew shimkabu.

U Devander haba kren bad u syllad.com haka jaka kaba thmu ban pynlong public hearing ula ong “Kiba pyrshah ïaka public hearing halor ka jingpynheh par mawshun ka Star Cement ki dei kba khwan myntoi shimet bad ki ialam bakla ïa u paidbah.”

Ula ong ruh ba ka jingtih mawshun kam pynjakhlia ïaka um ka wah, hynrei u dei u dewiong uba pynjakhlia ïaka um ka wah.

“Ha ka jingshisha kane ka jingpynsngew paidbah la khot na ka bynta ba ki paidbah kin ïoh ka lad ban pynsngew ïala ka jong ka nia ka jutang halor ka jingthmu jong ka company ban pynheh par mawshun,” la ong u Devander bad ula bynrap ruh ba kum ka company ka bud ryntih ïaki kyndon aiñ tih mawshun.

Ka Meghalaya State Pollution Control Board (MSPCB) kala khot ïaka Public Hearing halor ka jingthmu ka Star Cement ban pynheh ia ka par tih Mawshun haka jaka kaba heh 42.051 hectare haka shnong Bishyrnot haka sngi Saitjaiñ, hynrei kala pulom noh hadien ka jingpyrshah jong ki sengbhlang bapher bapher kynthup iaka JSM, JSU, KSU, ki 6 Shnong kiba shong ba sah harud wah Lukha bad kiwei kiwei.

Wat u Deputy Commissioner jong ka East Jaiñtia Hills District u Bah FM Dopth ruh ula shah pakhang lynti bad um shym la poi sha ka jaka kaba la thmu ban pynlong ïaka public hearing.