Kynnoh u waheh shnong Umkiang ba dawa pisa ki nongtrei JHADC ban leh Land Holding Certificate

Syllad | The Rising MeghalayaFebruary 17, 2022

U Waheh Shnong Umkiang Ma Lasting Pala ula ujor pyrshah iaki nongtrei jong ka Jaintia Hills Autonomous District (JHADC) halor ka jingkynnoh ba ki dawa pisa na ki paidbah nongshong shnong ka Umkiang ban thew ban woh iaki jaka ban ioh Land Holding Certificate (LHC).

U Lasting Pala ula buh da ka jingujor hakhmat i Revenue Officer, JHADC hadien ba ki paidbah nongshong shnong ka Umkiang kila ud la nam halor kane ka jingdawa pisa ki nongtrei ka konsil bad pan jingpynshai halor kano ka nongrim haba iaka bai LHC lada dep siew lypa.

“Manla ka por ki nongtrei jong ka JHADC ki wan sha ka shnong jong ngi bad thew ban woh ia ki jaka jong ki nongshong shnong jong ngi kiba aplai ia ki Land Holding Certiifcate(LHC) ban register iaka jaka jong ki bad ka JHADC. Nga sngew ban pyntip sha phi ba kini ki nongtrei jong ka JHADC kiba wan thew jaka, ki shait dawa pisa na ki paidbah jong ka shnong ngi bad ki don ka dor bala buh bad ym lah ban pynduna,” la ong u Ma Pala haba ujor sha i Revenue Officer ka Konsil.

Ula ong baroh ki briew haba ki aplai LHC, ki da siew lypa ia ka bai LHC ha ophis jong ka JHADC ha Jowai. Hynrei sngewphylla pat, ba kine ki briew jong ka JHADC ki dang dawa pisa na ki paidbah jong ngi.

Haka 16^th February 2022 ruh, ki la wan ban thew ki jaka jong ki paidbah jong ka shnong jong ngi bad ynda ki la dep ki la sdang dawa pisa na ki paidbah. Don ruh kiba ai, kiba tieng ioh kine ki briew ki pynthut iaka kam, hynrei don ruh kiba pyrshah. Kine ki briew jong ka JHADC kida ong ba kane ka dei ka dor bala buh bad ym lah ban pdiang duna.

U Ma Pala ula ong ba kawei ka longing kaba kine ki briew ki thew iaki jaka jong ka, ynda ki la dep thew ki la sdang ban dawa T.11, 000/- ( Khatwei hajar tyngka). Haba ka trai jaka ka kylli, kine ki nongtrei kila ong ba ka dei ka dor bala buh bad ka dei ruh ka bai sha bad ka bai treishitom jong ki. Kane trai jaka kala ki trai jaka kala tyrwa T.5,000 hynrei ki nongtrei ka konsil kim pdiang satia.

“Ngi sngew ban pyrshah jur iakane ka jingleh jong kine ki nongtrei jong ka JHADC bad ka dei ka lad bamsap kaba dei ban pynshitom katkum ka aiñ. Ki trai jaka, ki ia ujor sha ka shnong halor ka ne ka jingdawa pisa ki nongthew LHC.  U briew uba duk ba suk, un shem shitom katta ban siew ia kata ka dor bala buh da kine ki nongtrei JHADC bad la long kaba ka shnong ka pyrshah jur. Ki paidbah ki la pynsgew ruh, lada kim ai pisa ki shait maham ban pynthut iaka kam LHC,” la ong shuh shuh u ma Pala.

U Ma Pala ula pan jingpynshai halor kane ka jingdawa pisa ki nongtrei ka konsil bad kynnoh ba kane ka jingdawa pisa kam dei kaba jia tang haka shnong Umkiang hynrei kylleng kylleng bad la dawa ban pynshitom ia ki nongtrei ka konsil kiba iaid lait ka rukom treikam.

Ka dorbar shnong Umkiang kala ong ba lada ka konsil shimkhia ia kane ka kam dawa pisa ki nongtrei kam banse ban shim da ki lynti kiba tyngeh bad haduh u pud ban mudui da ka jingujor ejahar pyrshah ia ki nongtrei ka konsil.

Ia kane ka jingujor la phah kopi sha u MDC ka thain bad kiwei kiwei ki MDC.