Kynrei ka jingpang TB ha rilum Jaintia: 583 ngut kiba shah sumar la hikai iaki SHGs ban rat dyngkhong iaka jingpang

Syllad | The Rising MeghalayaAugust 11, 2022

Ban rat dyngkhong iaka jingpang Tuberculosis (TB) kaba kynrei bad saphriang haduh kine ki sngi, ka District Tuberculosis Officer, West Jaiñtia Hills kala pynlong ka jingai jinghikai iaki kynhun jong ki Self Help Group (SHG) bad jingïalehkai sha surok ne Street Play ban iada na ka jingpang TB ha Community Hall jong ka Dkhiah West bad iaka jingialehkai surok la pynlong ha iew Ladrymbai, East Jaintia Hills District haka sngi Palei.

Kane ka jingai jinghikai ka hap hapoh ka National Tuberculosis Elimination Programme (NTEP). Kane ka prokram ka thong ka long ban ai jingsumar eiei ha ki jaka sumar sorkar, ban jurip bniang iaki nongpang bad ban ai ka jingsumar ha baroh kawei ka ri.

Ki kynhun Self Help Group (SHG) kiba hap hapoh ka Meghalaya State Rural Livelihood Society (MSRLS) kiba wan iashimbynta hapoh 50 ngut.

Ka Dr. EBV Laloo, District Tuberculosis Officer kaba dei khmih iaka East Jaintia Hills bad West Jaintia Hills kala ong, ka sorkar India lyngba u Myntri Rangbah duh ka ri u Narendra Modi ka la sdang ïaka prokram kaba la tip kum ka National TB Elimination Programme bad ka thong ka long ban rat dyngkhong ïaka jingpang la kumno kumno ha u snem 2025.

Haba batai bniah iaka jingpur sted ka jingpang, kala ong ba ka jingpang TB dei ka jingpang iabit na uwei sha uwei pat bad na uwei u nongpang ka saphriang sha ki 10-15 ngut lada ym ioh iaka jingsumar kaba paka. Ki briew kiba bit ia kane ka jingpang lada kim ioh iaka jingsumar tang hapoh lai snem kane ka jingpang ka shim iaka jingim jong u/ka briew, la ong ka Dr Laloo.

Kala iathuh shuh shuh ba ka jingdon ki nongpang ha East Jaintia Hills District bad West Jaintia Hills District ki nongpang ki don haduh 743 ha u snem 2021. “Ha u snem 2022 naduh u bnai Kyllalyngkot haduh mynta ka sngi ki don haduh 583 ngut kiba shah sumar ne dih dawai haka ki jaka sumar sorkar bad lada nujor bad u snem uba la leit ka jingpang TB kala kynrei ha une u snem,” la ong ka Dr. Laloo.

Ki Dak Ki Shin:

Kala kyntu ïaki paidbah ba lada don ka jingshit, ka jyrhoh kaba neh haduh ar taïew tam, ka jingtlot jingswai, ka jinghiar haka jingkhia haka met bad ka jingsyep haka met haka por ba ki thiah mynmiet bad ki don ruh kiba jyrhoh snam, kim dei ban kheiñ sting hynrei kidei ban wan mar mar sha ki jaka test ba kin ïoh ïaka jingsumar kaba paka bad ban phah test ïoh ki don ka jingpang TB khnang ban lah ban tehlakam ïaka jingphriang jong ka.

Ka jingpang TB kaba lah ban pynkoit:

Ka Dr. Laloo ka ai ka khubor kaba shai sha ki paidbah ba ka jingpang TB kadei ka jingpang kaba lah ban pynkoit bad kala ban jur ruh ïa kito kiba ïoh ïa kane ka jingpang ban tista ïaka jingdih ïaki dawai kumba la bthah daki doktor khnang ba kin ïoh ïaka jingkoit na kane ka jingpang.

Kala pyntip ba naka liang ka sorkar ka la pynbiang ïaki dawai ha man ki jaka ai jingsumar bad ki paidbah kim donkam ban siew eiei ruh em.

Hadien ka jingai jinghikai la pynlong ïaka jingïalehkai Street Play ha Ladrymbai ba shim bynta da ki samla pule BSW Women’s College bad St Edmund’s College.

Ha kane ka jingai jinghikai la iadonlang ka Kong N Tracy Kharkamni State Coordinator, u Bah Pynkhreh Susngi District Programme Coordinator, ka Kong Tista Rymbai Cluster Coordinator bad Bah Diles Matlai Cluster Coordinator Block Khliehriat kiba napoh ka Meghalaya State Rural Livelihood Society.