Kynriah biang iaka Wapung C&RD Block sha Khliehriat, pan jingshai ka JAC

Syllad | The Rising MeghalayaSeptember 13, 2023

Ka Joint Action Committee Wapung C & RD Block, kaba kynthup ia ka Dorbar Shnong Wapungskur bad Dorbar Shnong Wapungshnong, ka la pynpaw ia ka jinglyngngoh bad ruh dawa ia ka jingpynshai na ka sorkar halor ka jingrah jyndat biang jong ka sorkar ia ka ophis treikam bashipor jong ka Wapung C&RD Block na Wapungskur sha Khliehriat

Ka JAC kala ong ba la pynkynriah ia kane ka ophis khlem kino kino ki jingpyntip na kaei ka daw lane kynjoh ktien ia ka Joint Action Committee Wapung C & RD Block, ia ka Dorbar Shnong Wapungskur bad ia ka Dorbar Shnong Wapungshnong, kiba la iadon bynta naduh ba sdang bad haduh ba wanrah ia katei ka Wapung C & Block na Khliehriat sha ki thaiñ Wapung.

Ha ka jingshisha namar ka jingbym pat dep ia ka jingtei ia ka ophis treikam ba pura jong ka Wapung C&RD Block ha ka jaka kaba ka shnong Wapungskur bad shnong Wapungshnong ki la ai sngewbha sha ka Sorkar Jylla na ka bynta katei ka ophis paidbah, la rah shwa shipor ia ka ophis treikam bashipor jong katei ka ophis ha kawei ka iing kaba don ha ka shnong Wapungskur ha u Lber, jong u snem 2022. Bad ba, naduh u tei u snem haduh ka 7 tarik mynta u bnai katei ka ophis ka treikam ha katei ka jaka bad iing ha kaba ai ia ka jingshakri ia u paidbah jong ka block, la ong Hercules Mutyen, secretary JAC Wapung C&RD Block.

Ula ong ba dei haka 8 tarik mynta u bnai pat la lap ba ia katei ka ophis treikam la rah noh biang sha ka Khliehriat khlem da pyntip sha ka JAC, Wapung C & RD Block lane sha ka Dorbar Shnong Wapungskur bad ka Dorbar Shnong Wapungshnong halor kaei ka nongrim ba hap ban leh kumtei.

U Ma Mutyen ula ong ba ha kane ka juh ka sngi ba rah ia ki tiar ki tar jong katei ka ophis treikam. Ula ong ba na kaliang ki nongialam jong JAC Wapung C & RD Block, ki la pyrshang ban wad ia ka daw halor ka jingrah biang ia katei ka ophis kaba la don mynta la shisnem shiteng ha Wapungskur da kaba pyrshang ban phone sha u Block Develop Officer ba dei peit ia katei katei ka block, hynrei u khlem shim satia ia ka phone bad la wad jingtip biang ruh da kaba kylli da ka message lyngba ka whatsapp hynrei ia kata ruh u khlem jubab.

Ar sien la buh mawnongrim iaka Wapung C&RD Block

Ka JAC kala pynpaw iaka jinglyngngoh ba kumno ka Wapung C & RD Block ka ophis kaba ka ki ar Dorbar Shnong- Wapungskur bad Wapungshnong, ki la ia don ka bynta kaba khraw ha ka ban wanrah ia katei ka ophis sha ka thaiñ Wapung da kaba ai ei ruh ia ka jaka kaba heh bha na ka bynta ban tei ia ka ophis treikam bad jaka sah ba paka jong katei ka block, hynrei ynda la rah biang ia ka na ka thaiñ Wapung sha Khliehriat, ka Dorbar Shnong jong kitei ki ar shnong bad ka JAC Wapung C & RD Block ki khlem tip ei ei shuh. La suba jur ba imat ka don kaei re kaei sha lyndet halor kane ka jingleh jong ka sorkar kumne.

Kumta khang ba ka JAC Wapung C & RD Block, ka Dorbar Shnong Wapungskur bad ka Dorbar Shnong Wapungshnong bad u paidbah baroh, kin dup shai kdar, la dawa ba ka sorkar lane kino kino ki bor ba dei peit ia kane, kin hap ban ai i aka jingpynshai kaba shai kdar ba na kaei ka daw pat ba la rah biang mynta ia katei ka ophis treikam bashipor jong katei ka block sha Khliehriat.

Ka JAC Wapung C & RD Block kan ym shong kli kti da lei lei ruh em ha ka jingiadei bad kane, ka kam, hynrei kan iai buddien ia kane tad haduh ba kane ka kam kan da shai kdar bad ruh wanrah biang ia katei ka ophis treikam bashipor jong ka Wapung C & RD block ha Wapungskur hi, ka jaka ha kaba ka ophis treikam ba pura jong katei ka block kan don kat kum ba la pynbna da ka sorkar.