Kynshew pisa para dkhot KSU ban thied shatri iaki khynnah skul

Syllad | The Rising MeghalayaJune 20, 2022

Ha jingduk jingrangli ki kmie ki kpa jong ka thain Amkoi hapoh Amlarem Civil Sub Division kim kot bor satia ban pynbiang sa ka shatri ban kup slap bad ban da na ka jingshit jong ka sngi ia la ki khun kiba da leit skul.

Ha kum kane kynti, ki nongialam jong ka Khasi Students’ Union Amkoi Unit hapoh jong ka Khasi Students’ Union War Jaiñtia Circle ki shim ia ka sein jam ban thied hi dalade na ki pisa kiba ki iakynshew para dkhot ia ki shatri ba ai lem sha ki khynnah skul jong ka thain.

Ha ka Sngi Saitjain ki kala pynlong ia ka jingialang ban sam paidbah ia ki shatri sha ki khynnah skul jong ka shnong Amkoi.

Kum shi bynta ban ïada naka jing lyngshop jong u slap haka por ba ki leit shala ki skul ha kane ka jingleit synñiang la ïalam da u President jong katei ka Unit U Samla Kyrpang Lamin.

U General Secretary U Samla Ïoanis Lamin ha ryngkat ka jing ïadon ryngkat da u Rangbah Shnong bad nongï alam shnong jongka shnong Amkoi.

Haba ai jingkren naka liang u Rangbah Shnong jong kane ka shnong u ma Aiborlang Lamin ula ai ka jing ïaroh ïaka KSU Amkoi Unit kaba la shim ïa kane ka sienjam kum shi bynta ban ïarap ïaki khynnah skul khamtam ïa kito kiba wan naka longïing kiba kham duna ka ïoh ka kot bad kane kan long shisha ka jing kyrkhu ïaki bad u la kyntu kynpham ruh ïaki nongïalam ba kidei ban treihok laka kam khnang ba ngin lah ban shakri hok ïaka Ri bad ka Jaidbynriew.