Kyntait ïaka NPP bad UDP ha ka Elekshon MDC lada ym treikam ka ILP

Syllad | The Rising MeghalayaJanuary 29, 2019

SHILLONG: U Chief Executive Member jong ka KHADC U Bah Hispreaching Son Shylla u la ong ba ki paidbah ki dei ban kyntait mardor ïa ka National People Party (NPP) bad ia ka United Democratic Party (UDP) lada ym pyntreikam ïa ka Inner Line Permit  (ILP) ha ka elekshon MDC.

Namar kan long ka bym don jingmut ban jied ïa kum kine parti haba ka jingthmu jong ki ka long tang ban jop elekshon na bynta ban ïoh kam ioh jam,  u la ong haba ïakren bad ki nongthoh kot haka sngi Ba Ar.

Ula kynthoh halor ka jingpyrshah jong ka Sorkar MDA ïa ka Citizenship Amendment Bill (CAB) 2016, U Bah Shylla ula kylli kan myntoi aiu ia ka Sorkar MDA ban pyrshah ïa ka Bill ha Delhi lada ki randien pat ban pyntreikam ïa ka Inner Line Permit kaba long ka stieh ka waitlam ban ïada ïa ka jylla Meghalaya.

“Nga la ong ïa u Chief Minister ka jylla ba phim donkam ban leit Delhi ban pyrshah ïa katei ka Bill shu pyntreikam tang ïa ka ILP ka la biang palat  khnang ba ka kam kan iahap ba ktien, ”

Ka KHADC ha ka jingialam u Bah Shylla ka la mynjur ia ka KHAD (Inner Line as adapted from the Bengal Eastern Frontier Regulation 1873) Regulation Bill, 2018 khnang ban talasi ban pyrkhing ia ka jingrung kyrthep ki bar jylla sha ri lum Khasi Hills. Hynrei haduh mynta ym pat ïoh ia ka jingsoi na u Lat ka jylla.

U Bah Shylla u la kynnoh ba dei ka parti BJP kaba khang ia ka Sorkar Jylla ban pyntreikam ia ka ILP ha ka jylla bad ka UDP bad NPP kim nud ban saham bad ka jingpyrshah jong ki ia ka CAB ka long tang ban lait jinghaw.

Haba kylli hato yn sa resain na ka NPP, Chief Executive Member u la ong ka por kan sa batai bad ia kaba mynta u la ai jingmut ba la dei ban pynkylla kyrteng ia ka NPP sha ka No Principle Party ne ka No Policy Party.