Kyntait ïakynduh u Chief Minister bad ka ECC Elaka Sutnga halor ki karkhana Coke Factory

Syllad | The Rising MeghalayaAugust 14, 2021

Ka Environment Coordination Committee (ECC), Elaka Sutnga kala pynpaw iaka jingbynñiaw kaba khraw bad kynnoh ba kyntait u Chief Minister kum u khlieh ka sorkar Jylla ban iakynduh bad ki wat hadien ba kila ai jingthoh ne buh tarik ne appointment ban iakynduh bad u na ka por sha ka por.

“Ki Waheh Shnong kila sngew sih ban tip ba u Chief Minister kum u khlieh ka Sorkar u kyntait ban ia kynduh ia ka ECC wat ha dein ba la dep buh ia ki appointment na ka por sha ka por ban iakren halor ka jingjyllei ki karkhana Coke Factory beaiñ ha Elaka Sutnga,” la ong u kyrwoh bala phah da u publicity secretary ECC ma Mehiwot Shadap.

Ka ECC kam sangeh ia kane ka kam kaba bha haba ia dei bad ka jingshahktah ka koit ka khiah, ka jingktah iaka mei mariang lada ka sorkar bad ka office ba trei kam u DC kam leh ei, ka ECC kan ialeh haduh ban da poi sha ka High/Supreme Court badon burom.

Ka ECC haka sngi Saitjan kala shong jingialang kyrkieh ban pyrkhat kam bad ki waheh shnong ryngkat ka jingbud ia ka Covid-19 protocal jong ka sorkar, da kaba pyntip ruh sha ka Office ba don burom jong U DC, kane ka jingiakynduh ka long ha ka Dorbar Hall jong ka ha ka shnong Latyrke, Elaka Sutnga.

Ha kane ka jingialang la wan 18 ngut ki Waheh shnong lem bad ki secretary shnong ki ba shah ktah kiba hap hapoh jong ka Elaka Sutnga.

Ka ECC ka la pynsngew ruh ia ki jingiaid lynti jong ka kam bad ki la bud dien sha ki offices bapher bapher jong ka sorkar sha ki waheh shnong bad la don ruh ki jingpynsgewthuh ia ki waheh shnong ha ka jingktah jong ki kharkhana coke da ki expert. Ki waheh shnong baroh ki pynpaw ia ka jingsngewdiaw ia ka jingleh khlieh shrieh ka Sorkar kaba kut ban pynbna tang ha ki lad pathai khubor khlem da leh pat kaei kaei ruh bad ka jingbym suidniew ka sorkar ia ki ud ki jingiam jong ki nongshong shnong.

Ha kane ka jingialang ki waheh shong ki kyndit ruh ban iohi wat hadein ba ka office jong u DC u la pynmih ia ki order Dated 15/07/2021 bad ka 02/08/2021 ban khang ia ki ne ki kharkhana Coke, pynban la lap ba ki ne ki kharkhana Coke factory ki leh bymsuidñiew ia kine ki hukum da kaba iai bteng ban thang bad pynmih tdem kat ba mon khlem salia.

Ka jingialang ka da kawei ka sur kala rai ryngkat ki Waheh Shnong lem bad ki Secretary Shnong ban leit mih sa shisien sha ka Office treikam jong U DC haka 16 tarik Nailar (August) ban wad jingtip halor kane ka kam. Ki Waheh shnong ki la rai ban leh da ka ba tyngeh hapoh ka jingialam ka ECC lada ka sorkar kan dang leh kuman ia kane ka jingud jingnam jong ka ECC bad ka Elaka Sutnga baroh kawei.