Kyntait ka BSF ba thombor ia ki riew paidbah bad pynjulor ia ki kali shimet ha East Jaintia Hills

Syllad | The Rising MeghalayaApril 24, 2024

Ka Border Security Force (BSF) Frontier Headquarters ha ka 23 tarik Iaiong, ka la kyntait ia ka jingdonkti jong ki shipai BSF ha kaba thombor ia ki laingut ki briew lane pynjulor ia kino kino ki kali shimet ha ka shnong Sonapyrdi, East Jaintia Hills, kumba la kynnoh da ka Khasi Students’ Union (KSU) East Jaintia Hills District Unit.

Ha u kyrwoh ba la phah da u Public Relations Officer jong ka BSF la ong ba ha ka sngi Saitjain ba la lah, ki shipai BSF kiba don hapdeng ka jingap pahara ha Sonapur ki la sakhi ia kumba 3-4 tylli ki kali kiba kit shini na Ladrymbai ban leit sha ki thain khappud shapoh Kuliang – Umkiang.

La ong ba ki BSF ki la kyrpad ia ki draibar jong kitei ki kali ba kin pyni ia ki invoice/ bill, lane ia kino kino ki kot ki sla kiba iadei bad kane ka jingkit ia ka shini, hynrei kim shym la lah ban pyni ia ki kot ki sla bad pyrshang ban phet krad. Hynrei hadien ka jingbeh thong ki BSF ki la ioh ban bat noh ia kawei ka lai hajan ka jingkieng Shymplong hynrei u nongniah u la phet krad noh sha ka jaka ba long khlaw.

Kham hadien la kam ba utei u draibar u la wanphai ha ryngkat katto katne ngut ki paralok hapdeng ka jingi shongshit kyiad bad sdang ban tim ban tla ia ki shipai BSF kiba don hapoh Check Post Sonapur. La kynnoh ba ki la byrthen bad thaw klumar ia ki BSF, hynrei na ka liang ki shipai ki la pyrshang ban tem ia ka jingiakynad.

Hadien kane la aiti noh ia kane ka shini ba la ioh kurup kumjuh ia ka kali Bolero sha ka tnat Custom ha Badarpur.

U PRO u la ong ruh ba ha ka sngi U Blei kaba bud u heh shipai jong ka kynhun BSF u la iakynduh ia ki rangbah shnong ka Shymplong bad Sonapur kumjuh ia ki nongshong shnong ban pynithuh ia ki runar kiba donkti bad pynshai ruh halor ka jinglong jingman namar kane ka kam khaii tuh.

Ka Tnat shipai BSF ka la pyntip ruh sha ki bor pulit ka Umkiang bad ruh sha ka ophis jong u SP Khliehriat ha kaba iadei bad kane ka jingjia.

Shuh shuh la ong ba KSU kala pynsaphriang iaki khubor ialam bakla khlem ki jingshisha. Ka KSU bad kiwei ki seng trei kam bhalang manla ka por ki pyrshang ban pynjah burom iaki BSF da ki jingkynnoh ba khlem nongrim. Ki shipai kiba ap pahara ka iarap ban tem iaka jingkhaii beain iaka shini, namar ba bun ki nongkhaii tuh ki pyrshang har rukom ki buit ban lait na ki shipai BSF.