Kyntait ka Dorbar Elaka Jowai ïaka kur Malia bad mana ban shna kur thymmai

Syllad | The Rising MeghalayaSeptember 23, 2019

JOWAI: Ka Dorbar Elaka jong ka Elaka Jowai da kawei ka jingmut kala kyntait ban pdiang iaka kur thymmai kaba tip kum ka kur Malia namar ba naduh ba sdang ïaka Elaka Jowai kam don kum kane ka jait kur hapoh u pud u ang ka Elaka bad baroh ka Rilum Jaiñtia haka dorbar kaba long ha Iungwalieh ka Dorbar Shnong Dulong haka sngi Nyngkong.

U Dolloi ka Elaka Jowai uba dei u Chairman ka Dorbar Elaka Jowai, Ma Puramon Kynjing ula pynsngew haka dorbar ïa ba ka don ka kur thymmai hapoh ka Elaka ka jait Malia, hynrei ka dorbar da kawei ka sur kala kyntait ban pdiang ïa kane ka jait ‘Malia’ kum ka kur namar ba ym ju sngew mynno myno ruh hapoh ka Elaka.

Ha kane ka dorbar la wanrah ruh ïaka draft ban buh haka jingthoh ha kaba ïadei ka Dustur Riti Synshar Elaka.

Ka Dorbar da kawei ka jingmut kala pdiang ïa kane ka aiñ Dustur Riti Synshar Elaka bad la ai jngmut ruh ban pynbha ïa kane ka aiñ ba ban batai khambniah ba kan nym wanrah jingsngewthuh bakla bad ïa kane yn sa shong pyrkhat sani haka Dorbar Executive kaba mynta shuwa ban phah sha ka District Council.

Ha kane ka Dorbar Elaka Jowai la wan ban ïashimbynta da ki nongïalam shnong bad ki dkhot jong ka Elaka na ki palat 82 tylli ki shnong kiba hap haka Elaka.

Ka Jowai Elaka ka don Saw Raij Saw Langdoh naduh Jowai, Ialong, Tuber, Chyrmang bad ka Raij Pamtadong bad Raij Padu na War Jaintia.

Ïa kine ki Raij la peit da ki President bad Secretary jong ki Seinraij bad ïaka niam la peit da u Langdoh.

U Dolloi ka Elaka u dei u khliehduh hapoh ka Elaka. U Pator u dei hapoh jong u Dolloi bad u dei u nongïarap ïa u Dolloi. U Pator u dei u nongpeit ïaki lai Langdoh kata ka Ialong, Tuber, Chyrmang bad u bishar tang ïaki khun ka Elaka.

U Dolloi u don ka bor ban bishar ïaka khajia pud, khajia jaka ki shnong bad u di ruh u nongpeit ïa u pud u sam ka Elaka bad ki shnong bad ban pynskhem ïaka jingbat khyndew.

Ha kane ka aiñ ki Langdoh ki dei tang ki nongpeit ïaka niam ka rukom.

U Waheh Shnong Pat ha kane ka aiñ kaba la wanrah u dei ban peit ban bishar tang ïaka kam shnong. Bad kidei ruh ban bud ryntih ïaka aiñ jong ka Jaiñtia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi, Sirdar and Waheh Shnong) Act 2015.

U no uno uba shongkha khleh lane bad kiwei pat ki jaidbynriew (Khyllah Jait) ki khun jong ki kim lah ban ïoh ïa ka kamai jong u khamtam ha kaba bat khyndew. Kano kano ka briew kaba shongkha khyllah jait kam donhok ban kam nongkynti ïaka kamai kajih u mynbarim lait noh tang ki khun kynthei jong ka bad lada jia ba kam don khun kynthei yn ioh pateng da ki para ki hymmen jong ka.

Ha kaba ïadei bad ka jingkylla kur, u briew uba shongkha khyllah jait um lah ban kylla kur bad ai kur ïa ki khun sha ka kur ka jait jong u. La mana ba ym bit ban ai kur ïaka kyrteng Kur jong kiwei khlem ka jingtip jong ki trai kur.

Ym dei ban shna kur thymmai. Ki seng kur ne ki kur ki dei ban pynrung kyrteng hapoh ka Elaka Jowai ïaka jait kur bad ban pynithuh ïaka kur bad tang ki kur kiba seng iaka Elaka Jowai kidei ki trai Raij.

Ka Dustur bat khyndew kan neh sha ka khun kynthei kaba khatduh jong ka longïing ban pynïaid da u Kñi Rangbah ka longïing.

Ka jaka bala thied da uno uno, lada jia khlem pat ai pateng, yn shim pateng da ki khun khatduh bad lada jia ba iap pat khlem khun yn ïoh da ki nongpeit nongsumar ba pyndep niam iap.

Ïa ki jaka bala bat da u briew bym don ba haiing hasem lada iap yn bishar ka kur ka jait, u Dolloi lane yn bat sha ka Elaka.