Kyntait ka HNLC halor ka kam dawa pisa jubor

Syllad | The Rising MeghalayaJuly 24, 2023

Ka Seng Hynniewtrep National Liberation Council (HNLC) ka la kyntait mardor ia ka jingdonkti ha ka kam dawa pisa kumba la sakhi lyngba ka lad pathai khubor kaba la mih mynta ka sngi 24 tarik.

Halor kane ka HNLC ha u kyrwoh lyngba u Bah Sainkupar Nongtraw General secretary ka la kynnoh ia ka jingdonkti jong ki kynhun runar ki bym don satia ia kano kano ka jingiadei bad ka seng HNLC. Ka HNLC kala maham jur ruh ia kino kino kiba pyndonkam bakla ia ka kyrteng jong ka seng na ka bynta ki kam dawa pisa jubor bad ruh ban shim ka jingpynshitom ia kino kino ki kynhun kiba shim kabu bad kiba pyrshang ban pynthut ia ka jingiakren iasuk kaba dang iaid shakhmat bad ka sorkar pdeng kumjuh ka sorkar jylla.

Ka HNLC ka la ong ba kiba kum kine ki juh ki jait jingjia kila jia ruh ha ki por kiba la dep da ka jingthmu ban pynpulom ia ka jingiaid shakhmat jong ka jingiakren iasuk lyngba ki kynhun shim kabu.

Haduh mynta kam pat shym la don satia kano kano ka jingiasoi soskular hapdeng ka sorkar India, ka sorkar Meghalaya bad ka HNLC bad ym shym la don ruh ki liang ki ban pyrshang ban pynpulom ia kane ka jingiakren.    

Kumta ruh ka HNLC ka kyntu jur ia ka tnat pulit ba ka dei ban shimkhia mardor halor kane ka jingjia bad ban kem ia ki briew kiba donkti khnang ban pynthikna ia ka jingiaid beit jong ka jingiakren iasuk kaba la iaid shakhmat. Ka HNLC ka kyntu ruh iala ka jong ka tnat syntiat ba kan thwet ia utei u briew uba donkti uba kyrteng u Shynshar Khymdeit bad u Samuel Wahlang.

Ha ka juh ka por ka HNLC ka la pynpaw ba katba kane ka jingiakren iasuk da dang iaid shakhmat na ka liang ki riew paidbah ki lah ban noh synniang sha ka seng ha ka rukom jong ka jingai sngewbha ne ka donation.

Kane ka jingpynshai na ka liang ka seng HNLC ka la wan long hadien ba ka la don ka jingkynnoh kumba la mih khubor ba ka seng ka la dawa pisa na ki nongkhaii heh spah ka jylla ha Rilum Khasi bad Jaintia. Ia kane ka shithi la soi bad phah da u M Rynjah uba kam ba u dei u Finance Secretary ka seng lane da u Synshar Khymdeit uba kam ba u dei u Area Collector jong ka seng uba peit ia kane ka East Khasi Hills bad Ri Bhoi.