Kyntait ka HNLC ia ka jingkren u CM halor ka jingthied jaka hapoh ka IMA, dawa pynsangeh mardor

Syllad | The Rising MeghalayaJanuary 13, 2025

Ka Seng kieng atiar Hynniewtrep National Liberation Council (HNLC) ka la kyntait jur ia ka jingpynpaw ba dang shen jong u Myntri Rangbah ka Jylla u Conrad K Sangma ha kaba iadei bad ka jingthied bad pyniaid jaka (land bank) hapoh ka Investment Meghalaya Agency (IMA) bad dawa ban pynsangeh noh mardor ia kane ka sienjam ba ka la shim.

Ka Seng ha ka jingpyllait khubor da u General Secretary-cum-Publicity Secretary ka HNLC, u Bah Sainkupar Nongtraw ka la kynnoh ba ka jingkren jong u CM kaba pyrshang ban tem ia ka jingma jong ka kam thied jaka hapoh ka IMA ka long kaba ialam bakla bad buh jingma kaba khraw ia ka jinglaitluid bad ia ki hok longtrai halor ki jaka puta jong ka jaidbynriew Hynniewtrep.

“Ka jingpynthikna jong u CM ba kan ym don ka jingktah ia ka Land Transfer Act (LTA) ka dei tang ka jingpyrshang kaba la khein sting ban pynjem ia ka jingsngewkhia katba ka dang thaw ia ki lad ban thied bad pyniaid jaka. Ka thong jong ka IMA ban thied bad pyniaid jaka ka iaid lait beit beit ia ka jingthmu jong ka Land Transfer Act kaba la thaw khnang ban iada ia ki jaka jong ki trai ri trai muluk na ka jingshah kurup. Ka jingaibor ia ka tnad sorkar ban trei kum ka land bank kan pynduhjait ia ka rukom pyniaid khyndew tynrai kiba la pynneh pynsah ia ka jinglong bad ka kolshor jong ngi la bun spah snem mynta,” u la ong.

“Ka jingong ba ka IMA kan ym iaid lait ia ki Autonomous District Council (ADC) lane ia ki Khlieh Nongsynsahr Shnong ka long kaba shukor kumjuh. Da kaba shim rai hi ha kaba iadei bad ka jingpyntreikam ia ki kyndon hapoh ka IMA, ka sorkar ka la buh sha lyndet ia ki tnad kiba la pynrung ha ka Sixth Schedule na ka bynta ban iada ia ka jingsynshar hi jong ki trai muluk. Kane ka sienjam ka pyntlot ia ka bynta jong ki ADC bad ki tnad treikam tynrai bad ka pynkylla long ia ki tang kum ki nongpeitkai halor ka jingshah shim kabu halor ki jaka puta kiba hiar pateng. Ka jingmut jong ki land bank ba la wanrah hapoh ka nongrim jong ka jingkyntiew ia ki kam bei tyngka ka pynlong mar mata ia ki jaka kiba la long trai bad pyniaid hi naduh ki pateng kiba la leit noh,” u la bynrap.

U Bah Sainkupar u pynkynmaw ba ha ka imlang sahlang jong u Hynniewtrep, ka khyndew ka shyiap kam dei tang ka tyllong hynrei ka nongrim jong ka jingithuh bad ka jinglong kyrpang jong ngi,” u la ong da kaba bynrap, “ka jingthaw ia ki land bank ka buh jingma ban pynduh ia kane ka jingiadei kaba kyntang da kaba plielad ia ki jingshah pynsakma, ka jingpynjot ia ka mariang bad ka jingpyndonkam bakla ia ki marpoh khyndew.”

“Ka jingpyniadei bad ki tnad kum ka MIDC bad ka MTDC ka dei ka jingpyrshang ban pynlong thikna ia ka jingbthah kaba ma jong ka IMA. Hynrei, ym kum kine ki corporation, ka bor jong ka IMA kaba khlem pat ju don mynno mynno ruh ban pynïasoh bad ai wai ïa ki jaka kiba heh ka buh jingeh beit ia ka rukom long trai kaba la iada ia ki jaka jong ngi la bun spah snem mynta,” u la ong.

Da kaba pynskhem ba ka jingroi ka ioh ka kot kam lah ban wan ha ka jingduhnong jong ka jingsynshar hi jong ki trai ri trai muluk bad ka jingsumar ia ka khyndew ka shyiap tynrai, u nongialam ka HNLC u la ong, “Ka jaitbynriew Hynniewtrep ka la sakhi ia ki jingkular ba thylli jong ka roi ka par ha ki por kiba la dep, ha kaba ki briew kiba nabar bad ki riew pawkhmat ki kheit ia ki jingmyntoi katba ki trai ri trai muluk ki kit ia ka jinglut jingsep. Ki jaka ba la tyrwa kim pher shuh – kin pynriewspah ia ki katto katne ha ka jingduhnong jong kiba bun, da kaba iehnoh ia ki briew jong ngi kum kiba khlem jaka puta bad kiba mad jingeh.”

“Ka jingkam jong u Myntri Rangbah ban iada ia ki jingmyntoi jong ki trai ri trai muluk ka sawa lyngngoh haba ki jingthmu jong ka IMA kim don ka jingshai bad ka jingiamir jingmut kaba don jingmut bad ki tnad tynrai. Ki rai shaphang ka jaka dei ban shim da ka jingmynjur jong ki paidbah, ym ban pynbor da ka tnad kaba trei na ka bynta ki nongbei tyngka nabar. Khlem da pynpaw pura ia ki jingthmu jong ka IMA, ki paidbah Hynñiewtrep ki don ka daw kaba biang ban ym shaniah ia kane ka jingthmu,” u la bynrap.

Shuh shuh, u Bah Nongtraw u la kynnoh ba ka jingthaw ia ki bank khyndew hapoh ka IMA kam dei tang ka policy, hynrei ka dei ka jingthombor beit beit ia ka hok longtrai bad ka nongrim kolshor jong ka jaidbynriew Hynñiewtrep. “Ka jaka jong ngi kam dei ka mar ban thied ban die. Ka long ka nongrim jong ka pateng jong ngi, ka tynrai jong ka kolshor jong ngi, bad ka snam jingim jong ka lawei jong ngi.”

Da kaba pynpaw ba ka HNLC kan pyrshah ia kano kano ka jingpyrshang ban pynduhjait ia kane ka jingiadei kaba kyntang, u la ong ba ka kynhun ka khot ia baroh ki jaidbynriew trai ri, ki nongialam tynrai, bad ki nongkyrshan ban ieng tylli ban iada ia ki jaka tynrai kiba hiar pateng jong ngi.