Kyntait ka iingbishar HC ia ka jingujor u MLA ka VPP pyrshah ia u Lamphang ka iingdorbar

Syllad | The Rising MeghalayaApril 25, 2024

Ka Iingbishar Meghalaya High Court ka la kyntait ban pdiang ia ka jingujor mukotduma da u MLA ka VPP na North Shillong u Bah Adelbert Nongrum pyrshah ia u Lamphang ka iingdorbar thawain ka Jylla u Thomas A Sangma halor ka nongrim ba u Lamphang u la khanglad ban wanrah ia ka mat iatai ba kyrpang (special motion) halor ka kaiphot ka Comptroller & Auditor General (CAG).

U MLA ka VPP u la pynpaw pyrshah ia ka jingleh jong u Lamphang hapoh ki kyndon Article 226 jong ka Riti synshar khadar jong ka ri ne Constitution halor ka jingbym ailad ia u nongujor ban wanrah ia ka jingiatai ba kyrpang  hapoh ka Rule 130A jong ka Rules of Procedure and Conduct of Business in Meghalaya Legislative Assembly ban iatai hapoh ka iingdorbar ha ka por ba la pynlong ia ka dorbar Mang tyngka 2024 halor ka kaiphot ka CAG ha ka Social and Economic sectors kaba kut jong u snem 31.03.2022 na ka bynta ka Jylla Meghalaya.

Ka jingshim bishar da ka Single bench ba la khlieh da u Justice HS Thangkhiew ka ong, Ia ka jingshim rai jong u Lamphang ban ym shah ban wanrah ia ka special motion ym lah ban shim ba ka dei kaba beain lane kaba long pyrshah ia ka constituion. La ban jur ruh halor ka Article 212 jong ka Constitution ka Ri kaba ong kaei kaba la kynthoh ha ka writ petition ka dei ka rai jong u Lamphang ha ka jingpyniaid dorbar bad ia kaba ym lah satia ban buh jingkylli da ka iingbishar.