Kyntait ka iingdorbar iaka bill shimet u dkhot ka VPP ban pynkhlain iaka tohkit bamsap

Syllad | The Rising MeghalayaFebruary 21, 2024

Ka iingdorbar thaw ain ka jylla haka 20 tarik Rymphang, kala kyntait ia ka Bill shimet, ka Meghalaya Lokayukta (Amendment) Bill 2024 ba la wanrah da u nongmihkhmat ka Seng Voice of the People Party (VPP) napoh North Shillong, u Bah Adelbert Nongrum lyngba ka voice vote.

 “Kiba kyrshan ia kaba pyrshah (No’s) ki la jop, bad kumta ym lah ban pyniaid shakhmat ia ka motion bad ym lah ban wanrah ia kane ka Bill ban iakren hapoh ka iingdorbar thaw ain. Kumta ia kane ka Bill la kyntait da ka iing,” ong u Lamphang ka iingdorbar u Thomas Sangma hadien ba la pynlong da ka jingia vote halor kane ka Bill.

Kham hashwa haba wanrah ia kane ka Bill, u Bah Adelbert u la ong ba ka amendment na ka bynta ka Lokayukta Act, 2021 ka la pyntroin ia ka jinglah treikam bha jong ka Lokayukta ha ka jylla, da kaba pynkylla halor ka jingdon ki dkhot ka Lokayukta bad ki judicial bench ki bym don shuh ka jingiahap na kaei kaba la wanrah naduh kaba nyngkong.

Nalor kata u la kynnoh ruh ba kane ka Meghalaya Lokayukta Act ba mynta ka la lute bad pynduh pyndam noh ia ki kyndon ain kiba kongsan kiba iaid ryngkat ka Lokpal bad ka Lokayukta Act jong ka Parliament.

U Bah Nongrum u la ong ba kane ka Bill shimet ka thmu ban iada bad ban pynkhlain ia ka jingtreikam jong ka Lokayukta ha ka jylla, kata khnang ban lah ban iakhun pyrshah ia ka jingkiew jong ki kam bamsap, ban pynskhem ia ki kyndon treikam jong ka Lokpal bad  Lokayukta Act ia kiba la pyndam bad wanrah bujli da ka Amendment Act of 2021 bad ruh ban pynkylla ia ka Meghalaya Lokayukta Act kaba don mynta khnang ban pynkhlain bad ban aibor shuh shuh kumba ka dei hok ban long.