Kyntait ka KHADC ban ai syrnot ST khlem ka syrnot jingpynshisha ba dei Khasi

Syllad | The Rising MeghalayaJuly 12, 2024

U Deputy Chief Executive Member ka KHADC u Bah Pynshngain N Syiem ha ka 11 tarik Naitung u la ong ba ka long kaba kongsan ban ioh ia ka syrnot jingpynshisha ia ka jinglong Khasi (Khasi Tribe Certificate) khnang ban ioh ia ka syrnot Scheduled Tribe (ST) lyngba ki bor ba dei khmih.

“Khlem ka Khasi Tribe Certificate, phim lah ban ai ia ka syrnot ST,” ong u Bah PN Syiem haba jubab ia ka motion ba la wanrah da u nongialam liang pyrshah u Bah Titosstarwell Chyne ban iakren halor ka bynta jong ka KHADC ha kaba ai syrnot Khasi Tribe ha ka jingiadei bad ka Khasi Social Custom of Lineage Act, 1997 hapoh ka Dorbar Lyiur kaba dang iaid shakhmat jong ka Council ha ka 11 tarik mynta u bnai.

“Kumjuh ruh ngin ym lah ban ai ia ka Khasi Tribe Certificate khlem ka syrnot na ka Kur ba la ai da ka Dorbar Kur, bad kumjuh ki Ophis jong ki Deputy Commissioner kim lah ban ai syrnot ST khlem ka Khasi Tribe Certificate,” u la ong.

Nalor kata u Dy. CEM u la ong ruh, “Kino kino ki bym bud ryntih halor ka jingai jait Kmie kim dei shuh ki Khasi bad kin ym lah ban ioh ia ka syrnot Khasi Tribe, kata kaba mut ba kin ym ioh ia ka syrnot ST.”

Haba pynpaw halor ka jingialang kaba dang shen ba la khot pynlong da u Symbud Myntri Rangbah ka Jylla uba khmih ia ka DCA u Bah Prestone Tynsong, u la ong ba ka KHADC ka la pynpaw shai ba ki ophis jong ki Deputy Commissioner ki dei ban bud ia ka Khasi Social Custom of Lineage Act, 1997.

“Shen yn sa pynmih ia ka jingpynbna ba la dep pynkylla ha kaba iadei bad kane ka phang. Ia kane ka jingpynbna yn sa pynmih da ka Tnat Social Welfare Department,” u la bynrap.