Kyntait ka KTFA ba don ka jingshong syier ha ka thain Marmain bad ka jingtah poster da ki shit niam Hindu

Syllad | The Rising MeghalayaMarch 3, 2024

Ka Seng Karbi (Mikir) Traditional Faith (Religion) Association (KTFA), Meghalaya ka la kyntait ia ka jingkren jong u MLA ka Nongpoh Constituency ha Assembly ha ka 27/02/2024, ha kaba iadei bad ka jingshong syier ki paidbah ha ka thain khappud Marmain bad halor ka jingdon jong ka jingwan tah postar da ka Seng shit niam Hindu na Assam.

Ka Seng ha u kyrwoh lyngba u President bad Secretary ka pynshai ruh ba na ka liang ki nongshong shnong bad ki nongialam ka Seng KTFA Meghalaya hadien ba ki la ioh sngew na ki social media ki la pyrshang ban wad jingtip hapoh ka shnong bad ha ki jaka ba marjan, hynrei kim shym la lap sabut ei ei ruh em ha kaba iadei bad kita ki jingtah postar hapoh shnong ne hangno hangno ruh.

Kumta ka Seng ka pynpaw ba katei ka khubor ka long ban ialam bakla, bad ha kajuh ka por ka kyrpad ruh sha ki nongshong shnong jong baroh kawei ka jylla ba kin ym sngewthuh bakla.

“Ha kaba iadei bad ka voice mail ba ngi ioh sngew baroh, ngi na ka liang ki nongialam jong ka KTFA ngi la pyrshang ban wad jingtip bad ngim shym la ioh kano kano ka sabut ba don kum kita kumba kren ha ka voice mail.”

Nalor kata halor ka jingkynnnoh bala shim rai ban phah weng ia ki dur statue na ki iingskul, kane kam long kaba shisha bad ym shym la don satia kaba kum kata ka rai, hynrei ka jingialang ha katei ka sngi ka long tang ka jingiasyllok haba shit ba shai hakhmat ki paidbah baroh kumno ban pynneh pynsah ia ka jingngeit Niam Tynrai sha kine ki thain.

Kumjuh halor Ka  jingkynnoh ba don ka jingiadei bad kata ka Seng Sanmilato Samatan Samaj kaba na Assam, na ka liang ka Seng ka sngew dei ban pynshai hangne ba kam don jingtip ne jingiadei ei ei ruh em shaphang kata ka seng shit Niam Hindu, bad ki dang shu ioh sngew na kato ka Voice Mail.

Shuh shuh ha kaba iadei bad ka Traditional Symbol, kum ka shi ka la pynpaw ba kam don kano kano ka jingtuklar ne hukum ban weng, hynrei ka shong ha ka bor jong u Syiem Hima Dumura (Doomora), kum u Syiem u Kmie ban pynbeit ia kane ka kam.