Kyntait ka MPSC ban pyllait paidbah ia ki marks eksam MCS ba pyrshah jur ki kyrtong ba iakhun

Syllad | The Rising MeghalayaAugust 3, 2024

Ka Meghalaya Public Service Commission (MPSC) kala shim ia ka rai ba kan ym pyllait paidbah ia ki marks jong ka MCS Preliminary Examination hadien ka jingpyrshah kaba jur da ki kyrtong ne ki candidates kiba iakhun ia kane ka eksam.

Katkum ka jingpynbna paidbah ba la pyllait da u Secretary ka MPSC kala ong, “Kumta yn ym lah ban pyllait paidbah ia ki marks ha ki jaka paidbah. Hynrei, ka Commission ka la ailad pat ban peit tang ia la ki jong ki marks tang lyngba ka jingtreikam lyngba ka OTP system.

Kane ka rai ka la wan long ruh shi sngi hadien ba ka Khasi Students’ Union (KSU) ka la pynlong ia ka jingiakhih da kaba shong kyllain mungor namar ka jingkynnoh halor ka jingleh bym hok ha kaba pynlong ia ka MCS Preliminary Examination, ka MPS personal interview bad ka Appointment ia ki Statistical Officer ha ka AH & Veterinary Department.  Ka Seng ka la dawa ruh na k MPSC ba ka dei ban pyllait paidbah mardor ia ki marks jong baroh kiba iakhun ia kane ka eksam MCS.

Hynrei, na ka liang ka Commission ka la ong, “Kane ka long ka jingpyntip sha baroh ki kyrtong kiba ialeh ia ka eksam ba ka jingtyrwa ban pyllait paidbah ia ki marks jong ka MCS Preliminary Examination ka dei kaba la pyrshah jur da ki kyrtong kiba iakhun ia ka eksam kiba la pynpaw ka jingsngew bynniaw namar kane kan pynkhein ia ka hok ba kyrpang jong ki, ka hok kaba kongsan ba la pynkupbor katkum ka Article 21 jong ka Riti synshar ka Ri India.”

“Ka jingpyllait paidbah ia ki marks jong ka eksam khlem ka jingmynjur kaba shai jong ki kyrtong kiba iakhun ia ka eksam kam dei satia kaba ym donkam, hynrei ka long ruh ka bym iahap,” ka la ong da kaba bynrap ruh, “Ka lah ban pynlong ia ki kyrtong ba kin shah bishar bniah kaba khlem nongrim, bad kaba lah ban ktah jur ia ka jinglong shimet ka jng ki bad ia ka jingim jng ki ha ki kam ki jam kiba ki trei ki ktah.Nalor kata ka pynkhein ruh ia ka nongrim jong ka jingburom iwei ia iwei pat.