Kyntait ka seng NHP ia ka jingkam u Aidonsing Nongsiej uba shah kem na Mawsynram

Syllad | The Rising MeghalayaFebruary 11, 2025

Ha kaba iadei bad ka dur khih ne video kaba la mih ha ka 9 tarik Rymphang ha kaba u Aidonsing Nongsiej uba la shah kem ha ryngkat saw ngut kiwei pat na Mawsynram u la kam ia lade kum u dkhot ba pura jong ka seng National Hynniewtrep People (NHP), na ka liang ka seng ka la pynpaw ka jingsngewkhia kaba jur da kaba ong ba u dei uba la shah weng noh na ka seng ha ryngkat baroh ki dkhot na West Khasi Hills naduh ka 2.02.2024 na ki daw ki bym lah kiar.

Ka NHP ka la pynpaw ka jingkyndit hadien ba ka la sakhi ia ka dur khih ha kaba u Bah Aidonsing u la pynshisha ia lade ba u dei u president jong ka seng. Kumta ka seng ka la pynrem jur ia kan ka jingleh ka jong u bad ka seng ka la ong ba kan shim ia ki sienjam kiba tyngeh pyrshah ia une u briew namar ka jingpynthohbria ia ka seng.

Lyngba u kyrwoh ka NHP ka pynshai ruh ba naduh ka sngi ba la weng noh ia u kum u nongkitkam ba pura jong ka seng, ka seng ka la kdew shai ba kam ithuh shuh ia u bad lada don kino kino ki kam shimet jong u kiba u la leh, ia kata ka seng kam lah ban bahkhlieh bad kam don jingithuh ruh.

Hynrei, kaba pynlynngoh ia ka seng ka long ruh ba kumno u ioh ia ka ID Card bad lada ka seng ka lap ba u la shu shna thok lane don kiba aibor ia u, ka seng kan sa leh da kaba tyngeh.

Halor kane ka seng ka la wan iakynduh ruh ia u officer incharge ka Mawsynram hapoh ka jingialam jong u Bah Mak General Secretary ka CEC ha ryngkat ka jingsynran lang jong ki katto katne ngut ki dkhot.

Kumban shu pynkymaw ba haka 9 tarik Rymphang ki pulit ki la ioh ban kem ia san ngut ki briew bad ioh kurup ia kawei ka pistol ba la shna ha Russia na ka thain Mawsynram, East Khasi Hills.