Kyntait ka sorkar jylla ia ka jingdawa ka liang pyrshah ban mynjur ia ka rai pyrshah UCC

Syllad | The Rising MeghalayaSeptember 21, 2023

Ka sorkar jylla haka sngi Palei ka la kyntait ia ka jingdawa jong ka liang pyrshah ban mynjur da ka rai ne resolution ban pyrshah ia ka Uniform Civil Code (UCC) halor ka nongrim ba ka sorkar kam kan dang wanrah ia ka Bill halor kane ka bynta.

Ia kane ka resolution ban pyrshah ia ka UCC la wanrah da u MLA ka Mawhati u Bah Charles Marngar bad ia kaba la kyrshan ruh da ki dkhot ka liang pyrshah ka All India Trinamool Congress (AITC) bad ka Voice of the People Party (VPP) hapoh ka iingdorbar thawain.

Haba jubab ia kane, u Myntri Rangbah ka jylla u Conrad K Sangma u la ong ba ka sorkar jylla ka la don eh ia ka jingsngew pyrshah halor ki jingthmu bad jingmut jong ka UCC namar ka long pyrshah ia ka nongrim jong ka ri India kaba don ia bunjait ki kynhun bynriew bapher bapher.

Hynrei, u la ong ba ka sorkar kam lah ban ju mynjur ia kane ka resolution khlem da bishar bniah shwa ia ki mat kiba don hapoh kane ka UCC Bill.

“Ka jingkylli kaba mih ka long hato ngi lah mo kum ki nongthaw ain ban pyrshah ne mynjur ia ka resolution khlem da tip bniah ia ki bynta kiba don hapoh jong ka UCC Bill. Shabar ka iingdorbar ngi lah ban iakren halor ka nongrim kaba ngi sngew ba ka lah ban jia, hynrei kum ki nongthaw ain mynta lada ngi dei ban pyrshah ia ka UCC, kaba nyngkong ka long ngi donkam ban don hakhmat jong ngi ia ka UCC Bill,” ong u CM ka jylla.

U Conrad u la ong ruh kam mut ba tang namar ba kiwei ki jylla ki la leh, ka Meghalaya ruh ka dei ban mynjur ia ka resolution. “Dei na kata ka daw, ngi donkam ban pyndonkam ia ka bor sngewthuh.Kumta ruh dei tang ynda ngi la iohi ia ka UCC Bill kumta ngi lah ban ieng kum ka sorkar.

Shuh shuh u CM u la pynthikna ruh ba ka iingdorbar kan ieng iatylli kawei ban pynpaw pyrshah ia kino kino ki sienjam kynthup ia ka Parliament lada ka don ka jingpyrshang ban buh jingma ia ka jingithuh, ia ka hok bad ka kolshor jong ki jaidbynriew riewlum ka Meghalaya.