Kyntait ka UDA iaka kynnoh pyndonkam bakla iaka pisa T.2.5 Klur ha JHADC

Syllad | The Rising MeghalayaJuly 2, 2020

Ka kynhun United Democratic Alliance (UDA) kaba ialam iaka Executive Committee ha Jaintia Hills Autonomous District Council (JHADC) da ka jingiatreilang ka National People’s Party (NPP) bad ka United Democratic Party (UDP) kala kyntait mardor iaka jingkynnoh pyndonkam bakla iaka pisa jong ka konsil kaba la kot haduh T.2.5 klur.

Kane ka kynhun kaba ialam u ma Thombor Shiwat mynta ka sngi kala shong jingialang kyrkieh ban iakren halor kane ka jingkynnoh iaka EC da ki lai ngut ki MDC BJP ba kynthup ia u Krison Langstang, Lakhon Biam bad u Dawan Lyngdoh.

Ha kane ka jingialang la iadonlang baroh 25 ngut ki MDC kynthup iaki EM jong ka kynhun UDA bad kila pynrem jur iaka jingkynnoh khlem nongrim ki MDC ka BJP iaka EC kaba ialam u ma Thombor.

Kine ki 25 ngut ki MDC kila ong ba ka EC kaba ialam u ma Thombor kam shym la pyndonkam bakla iaka pisa ka konsil bad kam don kano kano ka jingjah pisa hapoh ka konsil.

Kynnoh ki MDC BJP ba pyndonkam bakla u ma Thombor sa T.2.50 klur ka pisa JHADC

“Ngi dang pyrshang kumno ban pynbha bad wad ki lad ki lynti ban pynmih pisa bad pynduna bha iaka rukom pynlut pisa haka konsil khnang ban lah ban pyniaid shakhmat iaki kam ka konsil kaba don hapdeng ka jinghiran ka ioh ka kot. Kawei ka jingeh kaba hakhmat kadei ban siew iaka tulop jong ki nongtrei ka konsil kaba dei kawei na ki mat kaba ka konsil ka shem jingeh bad lada ngi pyndonkam bakla sa iaka pisa ka konsil shano kan ialam ia ngi,” la ong u ma Thombor bad bynrap ba kane ka jingkynnoh ka long tang ka jingpynthoh bria ka EC kaba u ialam.