Kyntait ka VPP ban iashim bynta ha ka All Party Committee ban iakren halor ka kam lynti rel

Syllad | The Rising MeghalayaApril 15, 2025

Ka liang pyrshah Voice of the People Party (VPP) ka la pynbna ia ka rai ba kan ym iashim bynta ha ka jingialang ka ban wan jong ka All Party Committee ba la thaw da ka Sorkar ban shong bishar halor ka phang kaba iadei bad ka jingpyniasoh lynti rel ha Rilum Khasi bad Jaintia.

Ha ka shithi sha u Chief Secretary u Bah DP Wahlang, u General Secretary ka VPP uba dei ruh u MP ka Shillong, u Dr Ricky AJ Syngkon u la ong, “Ka VPP ka sngewsih ban pyntip ba ia mynta hi ngin ym wan iashim bynta ha kane ka Committee.”

Haba pyrto ia ki sienjam ba la shim da ka sorkar ban thaw ia ka All Party Committee u Dr Syngkon u la ong, “Hynrei, ka VPP ka don ia ka jingsngew ba hashwa ban pynlong ia kano kano ka jingiamir jingmut ban wanrah lynti rel ha Rilum Khasi bad Jaintia, ka long kaba bha shibun ban leh ei ei nyngkong eh ia ki jingsngewkhia kiba shonghok jong ki paidbah ha kaba iadei bad ka jingbym lah ban tehlakam ia ka jingwan rung kyrthep ki briew kiba na bar sha ka jylla.”

U la ong ruh ba ka party VPP ka sngew ba ka jingthaw ia ka Committee ban iakren bad pyntreikam ia ki sienjam kiba lah ban khanglad ia ka jingwan rung kyrthep jong ki briew kiba na bar kum ka Inner Line Permit (ILP) – ka dei ban long kaba hakhmat ha ka jaka ban iakren halor ka kam pyniasoh lynti rel.

“Ngi ngeit skhem ba tad ynda la don ki lad jingiada kiba biang bad kiba lah ban tehlakam ia ka jingwan rung kyrthep ki briew kiba na bar sha kane ka jylla, ngi lah ban pdiang da kaba suk halor ka jingpyniasoh lynti rel, kata khlem da iapein halor ki jingmyntoi bad ki hok jong ki trai ri trai muluk,” ong u heh ka VPP da kaba bynrap, “Kano kano ka jingiakren kaba kyrkieh halor ka jingpyniasoh lynti rel khlem da phaikhmat shwa halor kine ki jingsngewkhia kan long tang ka jingpynlut kai ia ka por ba kordor bad  jingdon jingem.”

Dawa tohkit ka VPP ba pulom ka Sorkar ban pynlong ia ka elekshon JHADC kaba khuid ba suba