Kyntait ki samla pule ia ka rai u VC ban thung Pro VC na ka bynta ka Shillong bad Tura Campus

Syllad | The Rising MeghalayaNovember 14, 2024

Ki samla pule ka North Eastern Hill University (NEHU) kiba pynlong jingiakhih ki la kyntait ia ka rai jong u Vice Chancellor u Prof PS Shukla ban thung ia ki Pro Vice Chancellor na ka bynta ka Shillong bad ka Tura Campus.

Haba kren sha ki lad pathai khubor, u General Secretary ka NEHUSU u Toniho Kharsati u la ong, “Ngim pdiang ia ka rai ba la shim da u VC bad ha ka jingshisha ngi pynrem jur ia kane ka rai jong u VC da kaba ong ban thung ia ki Pro VC ha baroh ki artylli ki campus jong ka Shillong bad Tura.”

“Shah ba ngan kren shai ba ngi la sdang ia kane ka jingshah thngan ba khlem pud halor ka nongrim ban dawa weng mardor ia u VC. Ngi la ap khmih lynti ia ka jubab na u VC namar ngi la iohi ba wat u Myntri Rangbah ka Jylla ruh u la pynpaw ba haduh ka por janmiet ngin sa ioh ia ka jubab kaba bha. Hynrei, kane ka jubab ka long pynban ha ka jaka ba u VC un shah pynmih noh na ka campus hynrei ula thung pynban ia ki Pro VC ia kaba ki seng samla pule kim lah satia ban pdiang da lei lei ruh. Ngin pyrshah (boycott) ia kane ka rai,” u la ong.

Une u nongialam ki samla pule u la pynpaw ruh ia ka jingsngew pyrshah ia ka jingpynbna ba la pynmih da u Assistant Registrar (Planning) da kaba ong ba une u briew u dei hi uba la thung da u VC.

“Namar kata, kane ka jingleh donbor jong u VC ha kaba shim ia ka rai katba u dang don shabar jong ka skulbah bad khlem da bud ia ki kyndon ka dei kaei kaei kaba ki seng samla pule ki pynrem jur, bad ngim iohi ia kano kano ka jingmyntoi na kaba kum kane ka rai bad ngin bteng ban pyrshah (boycott) ia ka rai jong u VC,” u la bynrap.

Thung u VC ka NEHU ia ki Pro Vice Chancellor na ka bynta ka Shillong bad Tura Campus