Kyntait ki shnong khajia pud ban pdiang iaki jingai ka Assam: JSU

Syllad | The Rising MeghalayaApril 14, 2020

Iarap ka JSU, 7 Trep Rural Aid bad ka Ahor da ki mar bam sha ki shnong khappud

“Wat hadpdeng ka khim ka khait ki rangbah shnong jong ki thain khappud kiba don ha ki jaka ba iakhajia hadpeng ka sorkar Assam bad Meghalaya kila kyntait ban pdiang ïaka jingtyrwa iarap marbam ka sorkar Assam bad ki nongmihkhmat na Assam,” la ong u President jong ka JSU Lawyerson War.

“Kiba bun ki rangbah shnong na ki jaka khappud kila kyntait iaka jingwan tyrwa khaw ka sorkar Assam kumjuh na ki MDC jong ka Karbi Anglong, West Karbi Anglong dangshen namar ba ki tieng ioh ki shimkabu iaka jingtlot bad ka jingkyrduh ka jong ki tang ban ïoh kyntur sha u pud u sam ka Jylla Meghalaya. Ki paidbah nongshong shnong jong ka jylla Meghalaya ki la kyntait mardor ban pdiang ia kane ka jingiarap ka Assam bad ki khmih lynti ban kin ïoh ka jingiarap naka sorkar Meghalaya ha kum kane ka por ka saw ka sain na ka jingiakhun na ka khlam COVID-19,” ong Lawyerson War

U Lawyer ula ong ba ka Jaiñtia Student Union (JSU) ha ryngkat ka jingkyrshan ka 7 Trep Rural Aid bad ka kynhun Ahor ki lah hiar ban kner ia ka kti jingiarap jong sha ki paradoh parasnam kiba sah sha ki thaiñ khappud bad kiba don hadpeng ka jingiakhajia pud hadpeng ka Assam bad Meghalaya haka 12 tarik une u bnai.

Une u nongialam ka JSU ula ong ba ki paidbah kitei ki jaka khappud kila shah ktah bha na kane ka jingkhang khyrdep naka jingjngai ki iew ki hat ha katei ka thain bad kim shym la ïoh ka lad ban pynbiang ïaki jingdonkam ha iing ha sem.

Kine ki shnong khappud ki kynthup iaka Khatkasla, Psiar. Nalor kine ki shnong kahppud la lei tai jingiarap ruh Thadmuthlong

Ha kane ka jingsam marbam la iadonlang ki Rangbah Shnong bad ki Secretary shnong kiba la pynpaw iaka jingsngewnguh iakane ka kynhun bad kila pynpaw ruh ba ka sorkar Jylla kala ieh bein ia ki shnong khappud bad kam shym la pynioh kino kino ki lad jingiarap iaki nongshong shnong ha jaka khappud.

La pynpaw ruh ba bun ki nongshong shnong kim don ïaka ration card bad kiba bun ki longïing kila shah ktah n aka jingkyrduh marbam mardih nalor bym biang ki lynti syngkieng bad ka jingjngai ki iew ki hat.

Na ka liang u President ka JSU Laskein Circle u Dapmain Suchiang u la pynpaw ia ka jingsngewsih bad lyngngoh halor ka jingle sting ki nongmihkhmat ban ïarap ïa u paidbah ha baroh kawei ka block Laskein kumjuh la shu iehbein ia ki shnong khappud naduh ka Psiar, Khatkasla, Moolaber, Mojem bad kiwei kiwei ki shnong

Ka JSU kala wer bad khot ïa kiwei kiwei ki kynhun bad sengbhalang bad kyrpad iaka sorkar ban theh ki lad jingiarap sha kine ki shnong khappud.  Ka JSU kala iathuh ruh b aka 7 Trep Rural Aid kala iarap haduh 800 tylli ki longing ha rilum Khasi Jaintia.

Ka JSU kala kyntu ïaki nongmihkhmat ka thain ban pynioh ki lad jingiarap sha u paidbah ha kum kane ka por ba ki shem jingeh bad ban pynpoi hok iaki lad jingiarap sha u paidbah.