Kyntait pyniasoh biang u Mukul sha ka Congress ba kwah rung BJP: Vincent Pala

Syllad | The Rising MeghalayaMarch 22, 2024

U nongialam ka Seng Congress uba dei ruh u MP ka Shillong u Bah Vincent H Pala ha ka 21 tarik mynta u bnai u la ong ba ka Congress kala iakren bad u Nongialam ka Trinamool Congress (TMC) uba dei ruh u Myntri Rangbah barim ka Jylla u Mukul Sangma ba un wanphai biang sha ka Seng hynrei ula pynpaw ba u kwah ban rung noh sha ka Seng Bharatiya Janata Party (BJP) hadien kane ka ilekshon Lok Sabha.

Haba kren sha ki lad pathai khubor, u Bah Pala u la ong, “Nga phla hakhmat jong phi baroh ba ka kynhun jong nga ka la leit ban iakynduh ia u Dr Mukul bad kyntu ia u ba un wanphai biang. Nga la ong ia u Mukul ba un wanphai biang sha ka Congress lane un iai don bad ka TMC, ngin iatreilang, hynrei ma u hi da lade u la pyrshang ban ong ia ki briew jong ngi ban leit rung sha ka BJP.”

Da kaba kynnoh ba u Mukul u don ka jingangnud ban rung sha ka BJP, u Bah Pala u la ong, “Khlem pep u Mukul bad ka kynhun jong u kin pyniasoh sha ka BJP. Ki la pyrshang ban khring ia bun ki nongtrei jong ngi. Kum ka nuksa na Ri Bhoi ki la kren kren ia ki briew jong ngi ban ia rung noh sha ka BJP. Ha Shillong West bad kiwei kiwei ki jaka ruh ki nongialam ka TMC ki la pyrshang ban khot ia ki nongialam ban pyniasoh sha ka BJP. Na ka TMC ki la pynpaw ha ngi ba kin sa leit rung noh sha ka BJP.”

Kumta u Bah Pala u la ong ba dei na kane ka daw ba ka Congress ka la kyntait ban iatreilang bad ka TMC ha Meghalaya. Ha ka jingsngew ka jong u ka party ha ka Jylla ka la leh bha ia ka homework hashwa ban shim ia kane ka rai.

“Ha Meghalaya, nga hi shimet ha ryngkat ka kynhun jong nga ngi la iathir sani bha namar ngi tip ba ki nongialam ka TMC ki la iakren bad ka BJP la bun bunsien. Kumba ka long mynta ka la paw shai ba hadien kane ka ilekshon, kiba bun ki nongialam ka TMC kin sa leit pyniasoh sha ka BJP. Kumta ruh Nga la batai ia ki nongialam ba halor bad ki la mynjur bad Nga bad kumta ngim donkam ban iatreilang hangne namar ka TMC ka dei ka team B jong ka BJP.Kumta kam don satia kano kano ka jingiatreilang hangne,” ong u Bah Pala.

Nalor kata u Bah Pala u la pynpaw ruh ba kam shym la don satia kano kano ka jingiapher jingmut hapdeng jong u bad u Mukul Sangma. U la pynpaw ruh ba ka Seng Congress kan lah ban leh kham bha ban ia ka TMC hapoh Ri lum Garo ha kane ka ilekshon Lok Sabha ka ban wan.

“Nga tharai ka TMC kan ym ioh kham bun ki vote ban ia ka BJP.Ha ka jingsngew jong Nga ka TMC kan wan khatduh ha Garo Hills mynta ka kynti. Ka jingwan pyniasoh jong ki nongialam, ki nongtrei bad ki dkhot jong ka TMC sha ka Congress ha Garo Hills ka pyni ba ka TMC kan ym kot wat tang ia kaei kaba ka BJP ka ioh hapoh Garo Hills,” ong shuh shuh u Pala.