Kyntait thep vote ki nongkyrshan BJP ka South Shillong ha ka LS Election namar ka jingbitar: Sanbor

Syllad | The Rising MeghalayaMay 22, 2024

U MLA ka BJP na South Shillong u Bah Sanbor Shullai u la ong ba haduh 30 percent na ki nongkyrshan jong ka BJP ki la kyntait ban thep vote ha kane ka ilekshon Lok Sabha kaba dang shu dep shen namar ka jingbitar halor ka jingpulom jong ka party ban pynieng kyrtong napoh Shillong parliamentary seat.

Haba kren sha ki lad pathai khubor ha ka 21 tarik Jymmang, u Bah Sanbor u la ong, “Ha South Shillong haduh kumba 30 percent na ki nongkyrshan ba shitrhem ka BJP kim shym la leit ban thep vote namar ka jingbitar, bad kine ki kynthup ia ki rangbah, ki longkmie bad ki samla shynrang bad kynthei.”

U la ong ruh, “Ki volunteer jong ngi Bah ki briew ki la leit ban khnion ia u budam ka EVM hynrei namar ba ka kyrteng jong nga kam shym la don satia bad namar ka shap jong nga kam don satia ki la leit sha ki presiding officer ban kylli shaei ka kyrteng u Bah Sanbor bad shaei ka shap jong u Lotus jong u Narendra Modi bad kumta ki la ia mih noh khlem da thep ia ki vote jong ki.”

Haba pynpaw ia ka jingsngew skhem ba ka BJP kan jop napoh South Shillong Constituency, u Shullai u la ong, “Watla ka kyrteng jong Nga kam don ha katei ka jaka bad ka shap jong nga kam don hynrei ngin dang jop na ka consituency jong nga.”

Lah ban kdew ba ka BJP kam shym la pynieng kyrtong satia na baroh ki artylli ki constituency, kata na Shillong bad Tura hadien ba ka la rai ban kyrshan pura ia ka Seng National People’s Party (NPP) ha kane ka ilekshon Lok Sabha kaba dang shu dep shen.

Haba kylli, u Bah Sanbor u la ong, “Haba ki pynieng ia nga, Na la wan ha ka kyrdan kaba lai. Ngam shym la ioh ia ka Takma Ksiar, Ngam shym la ioh ia ka takma Rupa hynrei Nga la ioh pat ia ka kabu ban ieng ha ka kyrdan ki nongjop, kata da kaba ioh ia ka takma Rnong namar namar nga wan ba lai. Kumta nga sngew ba ha kane ka kynti kila dei ban pynieng kyrtong namar kumba phi iohi, nga la phah ia ka shithi ba kyrshan ia ka Dr Fenela Lyngdoh kum ka kyrtong BJP hynrei haba kut haba ka party kala pynmih ia kane ka jingbthah, ngi la hap ban mynjur ia ka” ula ong.

U Bah Shullai u la ong ba ka BJP ha South Shillong ka la kyrshan tylli ia ka seng NPP ha kane ka MP ielskhon ba la dep. U la ong ruh ba ki party liang pyrshah ki la ialam bakla ia u paidbah ba kin iada ia ki na ka jingpyrshang jong ka BJP ban pynkylla Hindu ia baroh ki paid Khristan.