Kyntait u CM halor ka jingkynnoh thmu thied helicopter na ka bynta ban shakri ia ki VIP

Syllad | The Rising MeghalayaDecember 29, 2023

U Myntri Rangbah ka Jylla u Conrad K Sangma haka 28 tarik Nohprah, ula kyntait mardor ia ka jingkynnoh ba ka sorkar ka don ia ka jingthmu thied helicopter na ka bynta ban aijingshakri ia ki riew pawkhmat ne ki VIP hapoh ka jylla kumba la sakhi lyngba ka lad pathai khubor, kata da kaba kdew ruh halor ka jingeh ha kaba ka sorkar ka iakynduh ha ka liang ka pisa tyngka.

Haba aijingkren lyngba ka video, u Sangma u la ong ba ka jingshisha hi ka long ba ka sorkar hi kam shym la don kano kano ka tender lane ban pynpaw ia kata ka jingthmu ban thied helicopter namar ki dei kiba remdor.

Katkum ka jingpynpaw ka jong u, u CM ula ong ba ka sorkar ka la khot tang ia ka tender na ka bynta ban shim wai ia ka helicopter ban aijingshakri ia ki VIP ha ka leit ka wan.

“Ngin pyllait tang ia ka tender kaba iadei bad ka jingshim wai, kata kaba tang shi por bad ba ngin siew ha ka nongrim jong ka jingpyndonkam kaba da ki kynta (hour basis) sha ka kompeni, bad dei tang kane ka lynti kaba biang tam kaba ngi lah ban aijingshkari bad ha kajuh ka por ban ym pynlutksan ia ka pisa tyngka,” ong u Sangma.

U la ong ruh, “Ka bym lah ban long ia ngi ba ngin thied ia ka helicopter, kata namar ka dei kaba remdor, kalong kaba shem shitom ban pynbit pynbiang ia ki jingdonkam bad ngi donkam ia ki pilot ba hap ban pynlut da ka sorkar nalor kiwei pat, kumta kam long satia kaba donkam namar ka leit ka wan jong ki VIP ka long tang ha ki khep ki khep bad ha kajuh ka por Nga lah ruh ban ong ba hateng hateng ki helicopter ki long kiba donkam namar ka jinglait ban tuh ia ka por bad ha ka leit ka wan kaba donkam kyrkieh da ki nongialam ba halor bad na ka bynta baroh ki jingthmu kiba ngi donkam ia ka helicopter, hynrei ka jingpyndonkam ka long tang khyndiat eh,” ong u Conrad.

Ha kawei pat ka bynta, u CM u la ong ba ka sorkar ka lah ban ujor da ka mukotduma bai mynrain khmat pyrshah ia katei ka lad pathai khubor namar ka jingpynmih ia kiba kum kine ki khubor ki bym shisha. U la ong ruh ba ki bor ba dei khmih jong ka Tnat DIPR kin shim ia ka rai ha kaba iadei bad kane ka phang.

U CM u la ong ruh ba kane ka lad pathai khubor ha ki por kiba la dep kila thoh ruh ba ka don ka kam bamsap kaba T.1300 klur hapoh ka Tnat Tourism hynrei hadien ki la  shem ba dei tang T.13 klur bad kam don satia kano kano ka kam bamsap.

Shuh shuh na ka liang u CM ula kyntu ruh ia kane ka lad pathai khubor ba kam dei ban pynmih ia kum kine ki khubor tang ban shu pynthohbria ia ka Sorkar namar ka dei ka sienjam ka bym dei.