Kyntait u CM ia ka jingkynnoh ka KAS halor ka jingdawa pynrung ia ka ktien Khasi ha ka 8th Schedule

Syllad | The Rising MeghalayaDecember 5, 2023

U Myntri Rangbah ka jylla u Conrad K Sangma haka sngi ba Ar u la kyntait ia ka jingkynnoh  jong ka Khasi Authors Society (KAS) halor ka jingbym shim khia ha kaba iadei bad ka jingdawa ban pynrung ia ka ktien Khasi ha ka khyrnit kaba phra (8th Schedule) jong ka Riti Synshar Ri ne Constituion.

Na ka liang u CM u la ong ba ka sorkar jylla ka la dep ban phah da ka shithi sha ka Sorkar Pdeng na ka bynta ban kynthup noh kloi ia ka Ktien Khasi kumjuh ia ka ktien Garo ha ka khyrnit kaba phra jong ka Riti Synshar Ri.

Haba kren sha ki lad pathai khubor, u Sangma u la ong  ba ia kane ka shithi ka sorkar ka dang shu dep phah ha u bnai Naiwieng ba la dep, kata hadien ka jingialang bad ka Khasi Author’s Society (KAS).

“Ha ka jingshisha hadien ba la mynjur ia ka jingshim rai ha kiba bun ki bynta, Nga la dep ban thoh sha ka Sorkar India na ka bynta ban kynthup ia ka ktien Khasi bad Garo ha ka 8th Schedule,” ong u Sangma.

“Hadien ba ki nongialam ka KAS ki la iakynduh ia nga ha ka taiew kaba nyngkong jong u bnai Naiwieng ba la lah, nga la dep ban phah ia ka shithi sha ka Home Ministry ban pynkynmaw biang ia ki sa shisien pat ha kaba iadei bad kane ka bynta…kumta kino kino ki jingkynthoh ki dei ban wad shwa bad iakren shwa bad ngi shwa ban jam sha kawei pat ka bynta namar ka lah ban ialam bakla,” ong shuh shuh u CM ka jylla.