Kyntait u Conrad, Mukul ban kynthoh halor ka jingtih dewiong ‘Open Cast’ ka Jylla

Syllad | The Rising MeghalayaFebruary 17, 2024

Ka Jylla kala shim iaka sienjam ban tih dewiong da ka stad saian lane da ki kor ki bor kaba long haka dur jong ka ‘Open Cast Mining’, kata da kaba tih iaka ‘liewlong kaba heh ban pyniakhlad iaka khyndew bad shim tang ia u dewiong, u Myntri Rangbah ka Jylla Conrad K Sangma bad u Mukul Sangma kila kyntait ban kren ne kynthoh eiei halor ki saw tylli ki project ba la pynkhreh ia kaba la mynjur da ka sorkar pdeng ban sdang iaka kam tih dewiong.

U Myntri Rangbah Conrad K Sangma haka 16 tarik Rymphang ula ong “Ki la ioh iala ka jong ka mining plan. Ngam dei u riewshemphang ha kaba iadei bad ka mining plan bad ngam kwah ban kynthoh eiei halor kane ka mat bad baroh kine ki plan ki dei kiba la ai jingbit da ki tnad ka sorkar pdeng bad kane ka dei kaei kaba ki la leh.”

U Myntri Rangbah u la ong kane ka mat kadei kaba kyllain bad ki don bun jait ki bynta kynthup iaka rukom bat khyndew ka iapher na kiwei ki jylla sha kiwei pat, kumta ruh ki kyndon ki policy ruh ki pher haba nujor bad ki jong ka ri bad kumta ter ter.

Kumta u la ong “ba da kaba khmih bniah halor kine kiei kiei baroh bad halor ka jingshisha ba kane ka la wan jia ha ka sien kaba nyngkong kumta kiei kiei kin kham shim por ban ia kaei kaba ngi angnud, hynrei shisien ba ngi la don ia ka system, ia ki polisi kumno bad lano kane ka urlong ha kaba iadei bad kane ka jylla bad kiei ki jingpyniabiang kiba donkam ban leh da kaba pynshong nongrim halor ki jinglong jingman bapher bapher, Nga thikna ba ha kine ki khyndiat bnai bad snem ki ban wan, kane ka rukom treikam kan kham iaid beit iaid ryntih. Kumta kane ka dei ka sienjam.”

Shen yn sdang ka kam tih dewiong stad saian, 4 tylli ki aplikeshon ap iaka EC

U Conrad ula ong ba ka sorkar ka sngewkmen ba kiei kiei ki iaid ha ka lynti kaba dei bad shen kan sdang noh ka jingtih dewiong haka stad saian

Katba na kaliang Myntri Rangbah barim ka Jylla, Mukul Sangma ula ong ba na kaliang jong u, um lah ban kren eiei halor ka open cast mining la yn lah ban leh ne em ha Jylla, khlem da iohi iaki jingbatai ba bniah ha kaba iadei bad ka rukom pyndonkam ia kita ki kor ki bor bad ka rukom.

U Mukul ula ong ba ki don ar bynta bad kine ki long kiba kongsan, kawei ka dei ka rukom pyntrei bad kawei pat kaba iadei bad ka aiñ.