Kyntait u DC East Khasi Hills ban weng ia ka kyndon 144 CrPC ha ka sngi niew vote

Syllad | The Rising MeghalayaMay 29, 2024

U Deputy Commissioner ka East Khasi Hills, u SC Sadhu ha ka 29 tarik Jymmang u la ong ba ki bor pyniaid district ki la pynkhlain ia ki bor pahara na ka bynta ka sngi niew vote jong ka Lok Sabha ilekshon ka ban long ha ka 4 tarik u Jylliew 2024, bad kyntait ruh ban weng noh ia ka kyndon 144 CrPC kaba khang pyrshah ia ki jingiaid rally ha kane ka sngi.

U Sadhu u ba la pynlong ka jingleit jurip ia ki jaka niew vote bad strong room ha madan Polo ha katei ka sngi shibynta ka jingpynkhreh ha katei ka sngi niew vote u la pynpaw sha ki lad pathai khubor da kaba ong ba kane ka jingjurip ka long ban bthah ia ki BLO bad kiwei ki kynhun kum ki Media team, Pulit, CRPF kiba pahara ia ka strong room bad ki jaka niew vote halor ki jingpynkhreh bapher bapher kaba ki la pynbeit.

“Ngi la pynkhreh bha na ka bynta katei ka sngi niew vote, kata kaba kynthup naduh ka jingiaid beit iaid ryntih jong ki kor EVM bad postal ballot na ka bynta baroh ki hynniew tylli ki district ia kiba yn niew ha kane ka jaka. Nalor kata ngi la pynkheh bha ruh ba kin ym don kino kino ki kynrum kynram ha ki jaka niew vote bad ba tang ki briew kiba la ioh bor kin iohlad ban rung sha ki jaka niew vote,” u la ong.

Na ka liang u DC u la pyntip ruh ba la buh la ka jong ka media cell na ka bynta kane ka sngi. “Ngi la pynshai ia ki kynhun pathai khubor ban pynthikna ba ki nongpathai khubor kin ioh kham kloi ia ki jingtip khnang ba ki jingai jingtip kin bteng khlem kano kano ka jingthut bad ha ka rukom kaba dei. Ngin buh ruh la ki jong ki screen na ka bynta ki nongpathai khubor bad ngin shah ruh ia ki ba kin rah ia ki mobile phone khnang ban ai ia ki jingtip na kane ka jaka.Kan don ruh la ka jong ka jaka pynieng kali ia ki seng sain pyrthei bad ia ki kynhun jong ki, ia ki ophisar kumjuh ia ki kynhun ba don bynta ha kaba niew vote.”

Ha kawei pat ka bynta, u DC u la ong ba un ym weng noh ia ka hukum kaba la khang pyrshah ia ka jingiaid proseshon bad rally ha katei ka sngi niew vote. “Ngin ym pynkylla ia kane ka hukum. Kam don satia ka jingpyrkhat ban pynkylla ia kane ka hukum hynrei nga ban jur ba kam don satia kano kano ka jingkhang ia ki party ne kyrtong ba kin ialehkmen ha la ki jong ki shnong ki thaw, ngim long pyrshah ia ki jinglehkmen ki jong ki,” u la ong.

U Sadhu u la ong ruh ba u la ioh pdiang ia ki jingkyrpad na ki seng sain pyrthei kumjuh na ki sengbhalang na ka bynta ban weng noh ia kane ka hukum 144 CrPC khamtam ha kaba iadei bad ka jingkhang ia ka jingiaid rally, hynrei la pynmih ia kane ka hukum da ka jingthmu ban pynthikna halor ka suk ka sain, ba kan ym don ka jingpynhut bad na ka bynta ka jingiaid beit jong ka leit ka wan jong ki paidbah.

“Namar ba ka ha 4 tarik Jylliew kaba dei ka sngi niew vote kan dei ka sngi longtrei bad ba ka jaka niew vote ka don hapdeng ka nongbah, kumta ka jingiaid proseshon ka lah ban wanrah ka jingpynthut ia ka suk ka sain bad ka jingdheng kali kumba ngi la sakhi ha ka ilekshon MLA. Kumta halor kine ki nongrim ngi la pynmih ia kane ka hukum ban khang pyrshah ia ki jingiaid rally ne proseshon,” u la bynrap.