Kyntait u Dy CM ba pyndonkam bakla iaka pisa ha kaba pyntrei ia ka Iew Laitumkhrah

Syllad | The Rising MeghalayaApril 25, 2025

U Symbud Myntri Rangbah ka Jylla uba khmih ia ka Tnad Urban Affairs, u Bah Sniawbhalang Dhar haka 24 tarik Iaiong u la kyntait war ia ka jingkynnoh ba ka la don ka jingpyndonkam bakla ia ka pisa ha ka jingpyntrei ia ka Iew Municipal ha Laitumkhrah.

Kane ka la wan long hadien ba u nongwad RTI dang shen u la mudui sha u Lat ka Jylla u CH Vijayashankar bad sha u Myntri Rangbah ka Jylla u Conrad K Sangma ban dawa pynlong da ka jingtohkit da Central Bureau of Investigation (CBI) halor ka jingkynnoh pyndonkam bakla ia ka pisa ha ka jingpyntrei ia ka Iew Laitumkhrah.

“Lada don kiba pan RTI kin hap ban jubab sha u. Lada u shem ia ki jingleh bakla, u lah ban bteng ia ki sienjam, kam don jingeh ia kata, hynrei ka jingshisha hi ka long ba kam shym la don satia kano kano ka jingpyndonkam bakla ia ka pisa,” ong u Bah Sniawbhalang haba kren sha ki lad pathai khubor.

Katkum ka jingpynpaw ka jong u, kane ka project ka dei kaba dang don hapdeng ka jingpyntrei bad kam don satia kano kano ka jingkylli kaba iadei bad ka jingpyndonkam bakla ia ka pisa.

Halor ka jingkynnoh kaba iadei bad ka jingkiew jong ka dor jong ka project, u Dhar u la ong ba kim pat shym la ioh pdiang satia ia kano kano ka jingujor da ka jingthoh halor kane ka phang.

U nongwad RTI u Napoleon S Mawphniang u la kynnoh ba ka don ka jingpyndonkam bakla ia ka pisa, ka jingpynkhein ia ki kyndon treikam bad ka jingbym iaid katkum ki kyndon kiba iadei bad ka jingiada ia ka mariang haba pyntrei ia kane ka project.

Nalor kata u la kynnoh ruh ba ka la don ka kam bamsap bad ka jingpyniaid bakla kaba lam sha ka jingkiew kaba haduh 36.8% ka dor jong ka project bad halor ka jingpynslem kaba palat ia ka saw snem.