Kyntait u EM Taxation ka JHADC ïaka kynnoh pyndonkam bakla ïaka pisa T.5.78 klur

Syllad | The Rising MeghalayaJune 16, 2020

U EM Incharge jong ka tnad Taxation ha Jaintia Hills Autonomous District Council (JHADC), u ma Winning Garland Sungoh ula pynshai paidbah baka jingkynnoh jong ka Jaintia Students’ Union (JSU) ba ka konsil ka pyndonkam bakla ïaka pisa T.5.78 klur ka long kaba bym don nongrim.

“Halor ka jingmih khubor ba pyndonkam bakla ka Executive Committee ka JHADC iaka pisa ba 5.78 klur ba la kynnoh da ka seng JSU, nga kum u EM ba peit iaka tnat Taxation department, nga kwah ban pynshai paidbah ba kane ka jingkynnoh ka long ka bym don nongrim.” la ong u ma Winning.

U Ma Winning ula ong “Nga kwah ban pyntip ba ia ki checkgate ban talasi ia ki kali kit mar ki bar jylla la aiwai (lease) ha u ma Eddy Stone Shylla haduh lai snem kata naduh ka 25th April 2018 ryngkat bad ki kyndon la ia soi ba un shim T.200 tyngka kawei ka kali ban bat ia kine ki kali ban peit ia ki kot ki sla jong ki. La iakut ba un siew sha ka ophis T.32,00,000/- (Lai phew ar lakh) tyngka ha ka shisnem.”

Ka JHADC ban pyniaid beit kala thung ruh ia ki inspectors ban jurip bad pyntikna ban iaid beit kane ka kam.

“Ka jingkynnoh jong ka JSU ba bamtuh ka Executive Committee ia ka pisa ka long tang ka jingmutdur bad kaba ialam bakla namar ba u nongshim  wai (lease) haba u siew pisa u thep beit iaka pisa ha Receipt Cell jong ka ophis bad ym lah ban sei iaka mano mano ruh. Kumta ki paidbah kim dei ban shah ialam bakla ha kum kine ki khubor ba shu ai khlem ki jingpynshisha.” la ong une u EM Taxation