Kyntait u MP ka Tura ba ioh jingkyrshan na ka BJP, kob iaka NPP ban beh iaki MLA BJP

Syllad | The Rising MeghalayaAugust 17, 2024

U MP ka Congress na Tura Parliamentary Constituency u Saleng A Sangma ha ka 16 tarik Nailar u la kyntait ia ka jingkam jong ka BJP ba ka la kyrshan ia u ha kane ka elekshon MP kaba dang shu dep shen, bad u la kob ruh ia ka seng NPP la ka nud ne em ban kynjat noh ia ki arngut ki MLA ka BJP na ka sorkar MDA.

Haba kren sha ki lad pathai khubor, u Saleng u la ong, “Haba u Bernard u kren halor kano kano ka bynta, (hato phi don jingngeit) ba baroh kin shim kum ka jingshisha? Hato phi tharai ba ka BJP ka la pynlong ia u Ricky kum u MP lane ia nga ban long u MP? Ka BJP bad ka Congress ki long kum ka ding bad ka um. Ngin ym iakhleh lang da lei lei ruh. Nga tharai ki la klumar jingmut namar Nga la kylla long u MP.”

Da kaba kynnoh ba dei ka BJP bad ka NPP kiba iatreilang, une u MP u la ong, “Man ba phi leit sha Delhi lada phi kylli iano iano ruh khamtam eh ia ki Myntri sorkar, ki shim ia kane ka jylla ba ka dei ka jylla kaba synshar da ka NDA. Kumta ha kano ka rkom ba ngi ioh jingkyrshan na ka BJP? Hato phi lah ban iathuh ia nga?”

U la ong ruh ba u pan ia ka jingkyrshan shimet na ki nongialam bad ym na ka BJP ha ka por ba la pynlong ia ka elekshon Lok Sabha kaba la dep.

Haba jer kyrteng ia ki katto katne ki nongialam, u la ong, “Nga la leit iakynduh ia ki katto katne ki nongialam, Nga la leit sha kito ki nongialam ka NPP ruh ban kyrshan ia nga. Kam mut ba ki la kyrshan ia nga halor ka nongrim jong ka jingbthah na ka party,” ong u Saleng. “Ka BJP kam shym la kyrshan ia nga bad kin ym kyrshan hi ruh ia nga wat hadien habud,” u la bynrap.

Haba kylli, une u MP ka Congress u la ong, “Lada ka NPP ka nud shisha, hato ka shlur ban kynjat ia kine ki arngut ki MLA ka BJP? bad ngeit ia ka jingkren u nongaiktien jong ki. Hato ki nud ban kynjat noh ia kine ki arngut ki MLA ka BJP na ka kynhun synshar, leh shwa ia kane bad ngin sa iakren hadien, bad ong ruh ia ki ba kin kren shaphang ka Congress.”

“Kim (NPP) donkam ia ki arngut ki BJP namar ki la don lypa 43. Kim donkam ia ka jingkyrshan na ka BJP. Lada ki shlan ki dei ban beh noh, ong ia u Rakkam ba un kynjat noh ia ki, bad sa ong pat ia ki ba kin kren shaphang jong nga,” kop u Saleng ia ka NPP.