Kyntait u Mukul Sangma halor ka jingthmu ban dang leitphai biang sha ka Congress

Syllad | The Rising MeghalayaDecember 5, 2024

Ban pynkut syndon ia ki khubor hamsaia, u nongialam ka AITC bad Myntri Rangbah barim ka Jylla u Mukul Sangma ha ka 4 tarik Nohprah u la ong ba kam don satia kano kano ka jingkylli ba un dang leitphai biang sha ka Congress namar kane ka juh ka seng ka iatreilang bad ka sorkar MDA ba la ialam da ka National People’s Party (NPP).

Haba kren sha ki lad pathai khubor u Mukul u la ong, “Phi kylli ia nga lano ngan leitphai biang sha ka Congress? Hynrei, ka Congress ruh ka don lang bad ki. Hato kam dei ka jingshisha.? Khie leit sha District Council. Phi kren shaphang ka Congress ha Meghalaya kaba khlem don lynti satia. Lada ki don ka jingpyniaid ne ka jingsngewthuh kaba biang kumta ruh kin sa tip la ki dei ne em ban iasoh bad ka NPP. Ki kren pyrshah haba paw hynrei shadien ki iatreilang ryngkat ryngkat.”

“Kumta u Dr Muskul u pynkut noh ia kane ka hamsaia namar ngam lah ban pynduh ia ka jingpyrkhat jong nga, ka jingkut jingmut jong nga ban shakri ia ki paidbah, ban tei ia ka Jylla ha ka rukom kaba iadei bad ka jingangnud jong ki paidbah,” u la bynrap.

Haba kylli, u Mukul u la ong ruh ba ka jingshim rai ka jong u ban ym leitphai sha ka Congress kam dei satia namar ka kam jong u kum u shimet ne namar u Bah Vincent H Pala.

“Don kiba ong lada u Mukul Sangma un leit kan kham suk ia u. Kata ka dei ka jingsngew jong ki. Ka lah ban kham suk, hynrei u Mukul um don ka jingngeit na ka ban ym iakhun. U Dr Mukul um donkam ia ka Congress ban shakri ia ki paidbah. Nga sdang ha ka sain hima kum u kyrtong shimet. Ngam donkam ia ka Congress, nga don ki paidbah kiba don ka jingmut jingpyrkhat ban iakhun na ka bynta ban shakri ia ka Jylla” ula ong.

Une u Myntri Rangbah barim u la kynthoh ruh ia ka polisi jong kane ka sorkar da kaba ong la shna ha kata ka rukom ba baroh ki kam khaii pateng ki dei kiba la shah pyniaid bad kiba lah ban ioh tang da ki katto katne kiba la jied.

Ha kaba iadei bad ka jingkylliap lama noh ia ka AITC Nongthymmai Block, u Mukul ula ong “Kito kiba khylliap lama ki dei ki riew shimet bad ki dei ki briew ki bym kwah ban iakhun namar kata ki la pyndem noh da kaba khylliap lama”.

Shuh shuh u Mukul ula kubur ruh da kaba ong ba um lah satia ban kyntait ha kaba iadei bad ki khubor ba u lah ban thaw noh la ka jong ka party sain pyrthei.