Kyntait u Myntri ba sam da ki jingbam bym tei ha ka por pynlong ia ka Meghalaya Games

Syllad | The Rising MeghalayaFebruary 20, 2024

U Myntri ba khmih ia ka Tnat Sports and Youth Affairs, u Bah Shakliar Warjri haka 19 tarik Rymphang, u la kyntait da kaba ong kam shym la don satia kano kano ka jingsam da ki jingbam kai ne ki bym tei (junk food) sha ki player ialehkai ha ka por ba pynlong ia ka Meghalaya Games, 2024 ha Tura, West Garo Hills.

Haba jubab ia ka jingkylli hapoh ka iingdorbar Assembly, u Bah Warjri u la ong ba ka la don ka jingsam ia ki jingbam khutia ha ka por ba plie ia kane ka lympung ialehkai sport, kata ha ka por ba ka President ka ri India ruh ka la wan ban iashim bynta kum ka Kongsan.

Nalor kata u Myntri u la pyntip ruh ba kam shym la don satia kano kano ka jingshim ia ki lad jingpynshitom halor ka jingsaphriang jong kane ka khubor kaba iadei bad ka jingsam da ki jingbam dap lyer sha ki player ialehkai.

Ia kane u Myntri u la pynpaw haba jubab ia ka jingkylli ba la wanrah da u nongmihkhmat jong ka Voice of the People Party (VPP) napoh Nongkrem u Bah Ardent Miller Basaiawmoit.