Kyntait u president ka NPP halor ka jingpynbor ai tiket ia u Dasakhiat na ka bynta ka MP election

Syllad | The Rising MeghalayaNovember 14, 2023

U President ka National People’s Party (NPP) ka jylla uba dei ruh u Symbud Myntri Rangbah ka jylla u Bah Prestone Tynsong haka sngi ba Ar u la kyntait mardor ba ka don kano kano jingpynbor ia ka party na ka bynta ban ai ticket ia u MLA barim ka Mawhati u Bah Dasakhiatbha Lamare na ka bynta kane ka election MP ka ban wan napoh Shillong  Parliamentary Constituency.

Haba kren sha ki lad pathai khubor u Bah Tynsong u la ong; “Kam long kaba shisha. Ngam don jingtip ei ei shaphang kata. Ngam tip nangno phi ioh ia kane ka jingtip, hynrei nga hi ngam don jingtip ei ei ruh.”

Kane ka jingpynpaw jong u president ka NPP ka la wan long hadien ka jingsaphriang ki khubor kiba kynnoh ba ka don ka jingbym ia sngewthuh jingmut hapdeng ki nongialam ka party, kata hadien ba u Symbud Myntri Rangbah ka jylla u Bah Sniawbhalang Dhar la ong ba u kwah ba ka party kan ai tiket sha la u jong u pyrsa u Bah Dasakhiat Lamare ban iakhun ia ka ilekshon MP ka ban wan.

Watla katta na ka liang u Bah Prestone u pyntip ba ka party ka lah ban sa pynbna ia ki kyrtong na ka bynta ka Shillong bad Tura parliamentary seat hapoh jong une u bnai.

U Bah Prestone u la ong ba ki la don kumba 5-6 ngut kiba kwah ticket ban iakhun na Shillong seat. Hynrei, ha kaba iadei bad ka Tura, ka MP ba mynta ka Agatha K Sangma kan dang shah jied biang ban iakhun ha kane ka election MP Lok Sabha ka ban long ha une u snem u ban wan.