Kyntait u SP ba shah bat ka kali u MLA Nongkrem ha ka jingtalasi iit iong

Syllad | The Rising MeghalayaSeptember 7, 2024

U Superintendent of Police, East Khasi Hills u Bah Sylvester Nongtnger haka 6 tarik u la kyntait ia ka jingkynnoh u President ka Voice of the People’s Party (VPP) uba dei ruh u MLA ka Nongrem u Bah Ardent Miller Basaiawmoit ba ki pulit ki la bat ia ka kali jong u ha ka jingtalasi ia ki kali kiba tah iit iong ha ki bynta ka shnong Mawlai.

Haba kren sha ki lad pathai khubor u Bah Sylvester u la iathuh ba ha ka 22 tarik Nailar ba la dep ki Pulit ka tnat Traffic ka Mawlai kila pynlong iaka jingtalasi paidbah ne random checking iaki kali ba tah iit iong ha surok kum shi bynta ban pyntreikam ia ka hukum jong ka Iingkashari Supreme Court.

“Hynrei hapdeng kane ka jingtalasi ha ka por kumba 11:30 la wan iaid kawei ka kali Fortuner ha kaba ki pulit ki la pynieng namar ka dei ka jingtalasi naphang, hynrei haba la talasi ki la tip ba ka dei ka kali jong u Bah Ardent bad kumta hi khlem da pynslem ki la pyllait noh khlem da talasi ia kane ka kali,” ong u SP.

U Bah Sylvester u la ong ruh ba kane kam dei satia ka jingtalasi kyrpang iano iano hynrei kadei ka jingtalasi paidbah (random checking) ym tang iaki kali riewshimet hynrei wat ki kali Sorkar ruh kila ngat lang. Ula ong ruh ba kat kum ki jingbthah jong ki bor ba halor, baroh ki Myntri Sorkar bad ki MLA ki don ia ka hok ban buh tang kawei ka kali tah iit iong.

Nalor kata u la pynpaw ruh ba ka la don ka jingbthah na ki bor ba halor ba baroh ki MLA bad ki Myntri Sorkar ruh ki dei ban phah ia ki Number Plate jong ki kali sha ka tnat kam pohiing bad kane ka tnat kan sa phah shaka ki Pulit ban leh ia kaba donkam.

Shuh shuh u SP u la ong ba kaei kaba la mih ha ki rynsan social media ba shah talasi ka kali jong u MLA kam dei satia kaba shisha namar ka dei ka jingtalasi paidbah bad haba don ka jingtalasi, lada ki kali kiba na shakhmat ki la sangeh, ki kali shadien ruh ki la sangeh lang namar ba kawei ruh ka dei ka surok kaba khim.