Kynthoh ka HNLC ba ka jingkhot iakren iasuk ka Sorkar ka dei ka buit ban pyntroin ia ka seng

Syllad | The Rising MeghalayaNovember 15, 2024

Ka seng kieng atiar Hynniewtrep National Liberation Council (HNLC) ka la kynnoh ba ka jingkhot iakren iasuk jong ka sorkar ka dei tang ka buit ban lah ban pyntroin bad ban banbor ia ka jingialeh jong ka seng.

“Ka jingkhot iakren iasuk ka jong phi kam dei kaei kaei, hynrei ka kam ba la dep iasylla na ka bynta ki jingmyntoi lade bad ym na ka bynta ka jingmyntoi ka jaidbynriew ka jong ngi. Ka jingthmu ba shisha kaba don sha lyndet jong kane ka jingleh ka dei ban pyntlot, ban pynduh mynsiem, ban rung khlieh bad ban pyniaid ia ngi khnang ban pyntroin ia ka jingialeh k jong ngi da kaba leh mynleh kumba wad jingsuk. Kane kam dei satia halor ka jingpyniasuk kaba shisha hynrei ka jingthmu ban pynduhjait ia ngi bad ban pyntroin ia ka jingialeh ka jong ngi,” ong u General Secretary cum Publicity Secretary ka HNLC u Bah Sainkupar Nongtraw lyngba u kyrwoh.

Kane ka jingkynthoh jong ka Seng ka la wan long ruh shi sngi hadien ba ka Sorkar Pdeng ka la rai ban pynjlan biang ia ka jingkhein beain ia ka HNLC kum ka kynhun beain sa na ka bynta san snem kynthih.

U Bah Sainkupar u la ong ba ka seng HNLC kam sngew phylla halor kane ka rai jong ka Sorkar ban pynngat biang ha ka jingkhein ia ka HNLC hapoh ka Unlawful Activities (Prevention) Act, 1967.

“Kane ka jingleh ka pynpaw halor ka jingiuhroit ia ka jingpynpaw pyrthei ia ka jingiakhih ba dei hok jong ngi bad ka jingpynthut ia ka jingialeh ka jong ngi ban ioh ia la ka jong ka jingsynshar hi da lade,” u la bynrap.

Nalor kata une u nongialam ka HNLC u la ong ruh, “Ki jingpynpaw ba la pynphriang da ka Tnad kam pohiing jong phi kaba pynpaw ia ka HNLC kum ka kynhun kaba tlot bor kaba don tang kumba 10-15 ngut ki dkhot ka pynpaw ia ka jingkhein troin ia ka bor jong ngi. Hynrei ki jingthoh jong phi hi ki pynpaw ba kine ki jingpynpaw ki long kiba ialam bakla, ha kaba 73 ngut ki dkhot ka HNLC ki la shah kem haduh mynta bad ka jingdon jong ki dkhot ka dang iai bteng ban kiew.”

“Ka jingshisha hi ka long ba tang lai ngut ki dkhot ki la pyndem noh ha kine ki san snem kiba la dep kaba pyni ia ka mynsiem iaishah kaba neh jong ka HNLC bad ka jingkut jingmut ha ka jingialeh. Kane ka pynpaw ruh ia ka jingiahap jingmut kaba nangroi hapdeng ki samla, kiba nang ithuh ba ka jingiakhih da ki tiar ka dang long ka lynti kaba lah ban iakhun bad pynpra ia ka rukom synshar khadar jong ka ri India kaba pynshitom beiñ,” u la ong.

Shuh shuh u Bah Sainkupar u la pynpaw ruh ba haduh kine ki sngi ka sorkar India kam pat shym la pynkylla ia ki rukom treikam bymman bad leh donbor. Dei ka sorkar India kaba pynlong thma pyrshah ia ka jaidbynriew jong ngi lyngba ki buit thok buit shukor.