Kynthoh ka Kong Ampareen ia ka VPP ba wanrah ia ka jakhlia sain pyrthei ha Meghalaya

Syllad | The Rising MeghalayaApril 19, 2024

Ka kyrtong ka Seng NPP na Shillong parliamentary seat kaba dei ruh ka Myntri Sorkar, ka Kong Ampareen Lyngdoh ha ka 19 tarik Iaiong, ka la ong ba ka jakhlia ne ka politik jong ka jingiapyniashun briew ba la wanrah da ka liang pyrshah Voice of the People Party (VPP) ha ka kam sain pyrthei ha Meghalaya ka dei kaba sngew bynniaw shibun.

Haba kren sha ki lad pathai khubor hadien ba la pyndep ia ka jingthep vote, ka Kong Ampareen ka la ong, “Ngan nym ong ba ka ilekshon ha Meghalaya ka la long kaba khluit bha, hynrei Ngan ong ba ki don ki nongialeh ha ka kam sain pyrthei kiba pynjakhlia, ka jingbym don ia ka burom bad ka dei kane ka party kaba pynkthang ia ki jingmut jingpyrkhat jong baroh, bad dei na kata ka daw Nga la kren halor ka jingbam klop ia ki jingmut jingpyrkhat jong baroh. Kito ki sngi jong ka jingiaburom markylliang hapdeng baroh ki party sain pyrthei ha ka jylla ki la kut noh.”

Ka Kong Ampareen ka la ong ruh, “Nga la don bynta ha ki kam sain hima sima naduh ba Nga dang 8 – 9 snem rta, hynrei Ngam pat ju iohi ia kaba kum kane ka mynsiem isih briew, bad kane ka dei kaba ima shibun bad kane hi ka ban sa pynjot ia ngi.”

Haba kylli, ka Kong Ampareen ka la ong, “Kane ka dei ka sien kaba nyngkong ba Nga la iakhun ia ka ilekshon MP, Ngan nym ong ba nga sngew skhem, hynrei Ngan ong ba ka kynhun jong nga ka la trei shitom shibun, ka party jong nga ka la iatrei bha ha kane ka kynti bad baroh ki shipai ki la iatrei borbah ban pan ia ka jingkyrshan jong u paidbah, bad lada phi kylli ia nga la kane kan long ne em kaba seisoh, Nga ngeit kan urlong namar baroh ki la iatrei shitom ban iakhun pyrshah ia ka politik jong ka jingpyniashun kaba la mih ha ka jylla Meghalaya tang na ka bynta kawei ka MP ilekshon.”

Hab shim ia ka jingiaid lynti kum kaba sngewhun, ka Kong Ampareen ka la ong, “Nga la trei shimtom bad shimkhia naduh ka mynsiem, Nga la aiti lut met bad mynsiem bad nga la ai ia kaba bha tam ha ka jingiaid lynti ha baroh ki 36 tylli ki constituency. Nga kular ba Ngan nangtrei shitom ban pynthikna bad ngin iatreilang ha baroh ki 36 tylli ki constituency ban pynthikna halor ki jingioh jingmyntoi na ka bynta u paidbah.”

Shuh shuh ka la ong, “Ngi don hangne ban shakri ia u paidbah, ngim dei ban iapein bad nga la buh jingthoh ruh halor baroh ki jingiakynduh ha kane ka jingiaid lynti ioh ba nga klet bad Ngan pynthikna ba ngan iasaid bad iasyllok bad kren ia ki mat ne ishu kiba nga sngew ba ki donkam kyrkieh ban leh ei ei da ka sorkar.”