Kynthoh ka KSU ia ka tnat Personnel & AR bym iahap ka jingpynrung kam ‘guitar instructor’ katkum ka roster

Syllad | The Rising MeghalayaOctober 13, 2024

Ka Khasi Students’ Union (KSU) ha ka 12 tarik u Risaw ka la kynthoh tyngeh ia ka tnad Personnel and Administrative Reforms halor ka jingkynnoh jingleh bym iahap katkum ka roster ha kaba iadei bad ka jingpynrung kam ‘Guitar Instructor’ hapoh ka Tnad State Institute of Arts & Culture.

U Chairman ka KSU Employment Monitoring Cell u samla Reuben Najiar u la ong ba ka Seng ka la pan jingshai na u Director ka Tnad Arts & Culture ha kaba iadei bad ka jingpynbna (advertisement) kaba 19 tarik Nailur 2024 kaba dei na ka bynta ka post ‘Guitar Instructor’ hapoh ka Tnad Arts & Culture.

Ha ka memorandum ba la aiti ruh sha u Director ka Tnad Arts & Culture, u Reuben u la ong, “Da kaba pynshong nongrim katkum ka jingpynbna, ka don tang kawei ka kam ne post na ka bynta ka kam ‘Guitar Instructor,’ bad da kaba pynshong nongrim katkum ka roster, kane ka post la bhah na ka bynta ki jaidbynriew Garo. Ka jingdon nongtrei na ka bynta kane ka post hapoh kane ka Tnad ka long 2 ngut, bad kawei ka post ia mynta ka la dei lypa kaba la mang sha u kyrtong ba dei na ka jaidbynriew Garo.”

“Kumta ruh kane ka post ba la pynbna ka dei ban long na ka bynta ki Khasi-Jaintia khamtam hadien ba kane ka post ka dei kaba la pynsah thylli da ka jingshongthait jong u nongtrei uba dei u Khasi, hynrei kane kam shym la long satia ha kane ka kynti kaba mynta,” u la ong.

U samla Reuben u la ong ba ha ka jingialang, u Director bad staff ka Arts & Culture ki la pynshai ba ka jingpynmih hukum halor kane ka bynta ka dei kaba la pynmih da ka tnad Personnel & AR bad ba kim don bor ei ruh halor ha kaba iadei bad kane ka bynta.

“Hadien ka jingtohkit bniah, ka seng ka la lap ia ka jingleh thurmur jong ka Tnat Personnel & AR ha kaba u kyrtong uba dei u Garo u la shah jied ha kane ka kam ha u snem 2007 da kaba shah kynthup ha ka roster kaba hap ha ka bhah jong ki Khasi -Jaintia kaba dei ka jingleh kaba hap ban pyrshah jur. Mynta ruh haba la dei ban pynmih biang ia ka jingpynbna na ka bynta kane ka post, kane ka Tnad ka la pynmih biang ia kane ka kynrum kynram da kaba ai biang sha ki jaidbynriew Garo, kata wat hadien ba u Garo u la shah thung ha ka bhah jong ki Khasi-Jaintia. Kane ka pyni ba 100 percent na ka bhah ka la leit sha ki Garo,” u la ong da kaba bynrap, “Kane ruh ka pyni ba ka Sorkar ka la shukor ia ki paid ka thain Khasi-Jaintia namar katkum ka jingiamynjur, la kdew shai ba ia ka roster yn pyntreikam nangne shakhmat ym ban phai shadien.”

“Kumta, ngi la shim ia ka rai ban iakhun halor ka hok jong ka jaidbynriew Khasi da kaba pynkut noh ia kane ka kam leh donbor da ki briew kiba don ha ka Sorkar. Ngin dang ap ia ka jubab ba thikna na ka Directorate of Arts & Culture bad ha kine ki khyndiat sngi ki ban wan ngin sa iakynduh ruh ia kiba don ha ka Tnad Personel & AR na ka bynta ban pynbeit ia kane ka jingleh bym iahap,” ong une u nongialam ka KSU.